Accessibility links

Кайнар хәбәр

Törkiä: bağımsız balalarğa qarata naçar mönäsäbät könüzäk mäsälägä äylände


Bu atnada Törkiäneñ köntärtibendä baytaq keşene räncetkän temalarnıñ beresen yätim, ügi yaki taşlanğan balalar tärbiälängän däwlät qaramağındağı balalar baqçalarınıñ häm yortlarınıñ ifrat däräcädä naçar xälläreneñ faş itelüwe buldı.

Moña Malatya isemle urta Anatoliä şähärendäge ber balalar baqçasında qarawçılarnıñ keçkenä balalarnı niçek itep qıynawların kürsätkän, yäşeren genä töşerelgän ber filmneñ televiziä ekrannarı aşa kürsätelüwe säbäp buldı. Şunnan soñ Törkiäneñ här ber öleşennän diärlek köçle protest tawışları kütärelde. Däwlät qaramağındağı tulay toraqlarda keme dä bulmağan balalar belän yäşüsmerlärgä naçar möğämälä turında urını kilgändä yazılıp, söylänsä dä moñarğa iğtibar itüçelär bik bulmıy ide. Qayçan tamaşaçılar Malatyadağı balalar baqçasında bulğan dähşätle xällärne üz küzläre belän kürdelär ul çaqta reaksiä tudı. Babaylar äytmeşli “küz kürmäsä, can tüzä”.

İnde Malatyadağı balalar baqçasındağı xällär faş itelgäç, mätbuğat organnarınıñ hämmäse, törle oyışmalar, akademiklar häm säyätçelär bu mäsäläne Törkiäneñ töp temasına äwreldelär.

Bigräk tä şuşı balalar baqçaları belän yortlardan cawaplı däwlät ministere Çubukçuğa zur höcümnär buldı. Şul uq balalar baqçasına ütkän yılda da, ber balanıñ üz üzen üterüwennän soñ Ankaradan revizorlar cibärelgän buluwı, läkin ber närsäneñ dä üzgärmäwe dä açıqlandı. Şunnan soñ ministergä höcümnär tağı da arttı. Tege yaqtan xökümät tä öç yıl buylap kiştälärdä yatqan sotsial xezmätlär reforma qanun proyektın mäcleskä kiterü buyınça qarar birde. Malatyadağı 6 yäşkä qädär balalar qarala torğan balalar baqçasındağı xällär faş itelgännän soñ, ilneñ törle yaqlarınnan oxşaş şikayätlär kilä başladı. Misal öçen Şanlıurfadağı Sabancı isemle Qızlar yortında tärbiälängän keme dä bulmağan 13 belän 18 yäş arasındağı qızlarnı mödir Aytekin Erdoğan, censi räweştä qomaçawlawda, qıynawda häm naçar möğämälä kürsätüde ğäyeplände. Ber yaqtan Malatyadağı balalar media aldında şöhrät qazanğaç, alarnı moral cihättän tözälsennär digän sıltaw belän İstanbulğa alıp kildelär. Däwlät Ministrı Çubukçu da balalar baqçasına vizit yasadı. Ä Şanlıurfadağı qızlar yortına isä şähärneñ valisi Şemsettin Uzun belän AK partiä deputatı Mahmut Kaplan häm qayber başqa yuğarı däräcäle şäxeslär vizit yasadı.

Ul arada 33 AK partiä deputatı belän 150 CHP partiä deputatı Törkiä Böyek Millät Mäclesenä ğariza birep bu mäsälälärneñ Mäcles tarafınnan tikşerelüwen taläp ittelär. Bu waqiğälär bulıp yatqanda, Malatya solıx mäxkämäse tarafınnan balalar baqçasındağı xällärneñ mätbuğat tarafınnan çağıldırıluwınıñ tıyılğan buluwı turında xäbär çıqtı. Mäxkämä şulay itep balalarnı saqlawnı maqsat itep quysa da, yuristlar “bu sensura, kostitusiägä qarşı, bulay bula almıy” digän reaksiä kürsättelär.

Inde Sotsial Xezmätlär häm Balalarnı Saqlau Oyışması general direktorı İsmail Barış, Ramazan bäyrämendä hämmä keşene balalar baqçaları belän yäşüsmerlär tärbiälängän tulay toraqlarğa vizit yasarğa çaqırdı. Qayberäwlär dä keme dä bulmağan ber balanıñ saqlawçı ata-anası bulu öçen möräcägät itä başlağannar.

İnde mondıy cirlärdä üskän balalarğa aş-su, kiem-salım, yataçaq urınnan da küberäk şäfqat kiräk. Dönyanıñ här öleşendä şundıy keme dä bulmağan millionlağan bala bar. Bu meskennär şäfqat belän tärbiälänä almasa cämğiätkä dä bik faydaları timäyäçäk.

Ramazan ayı ütte, Törkiä bik zurlap bäyrämne qarşı aldı. Aynıñ öçennän başlap atna azağına xätle yal. Hämmä keşe ata-anaları, tuğannarı, dus işläre belän bäyrämläşte. Balalarğa büläklär alındı. Läkin keme dä bulmağannar bu häm kiläçäk bäyrämnärne niçek qarşı alaçaqlar, bu turıda da qayğırtılsa ide, bu da izge eş bulmas ide me digän uylar kilä. Ramazan bäyrämegez möbaräk, sälämätlägegez yaxşı, eşläregegez uñışlı bulsın!

Äxtäm İbrahim, İstanbul
XS
SM
MD
LG