Ramazan märxämätlelek ayı? dip sanalğanğamı, dini bäyrämnär waqıtında balalar yortlarına xalıq ağıla. Balalarnı bäyrämnärdä genä qayğırtalarmı, ällä bu eş daimi baramı, bu balalar niçek yäşi, aşarlına citäme? Bu sorawlağar cawap tabır öçen, Qazannıñ 1nçe nomerlı bala yortına barıp qayttıq. Qazan üzägendä urnaşqan №1nçe nomerlı bala yortına, qarawçısız qalğan sabıylar elägä. Qazan bala tudıru yörtlarında, änilärenä kiräkmiçä taşlanıp qalğan, ata-ana xoquqlarınnan mäxrüm itelgän ğailälärneñ sabıyları, yätimnär şuşında waqıtlıça yäşäp ala. Xäzerge waqıtta, 1nçe bala yortında 78 bala bar. Qazanda, respublika rayonnarında, kürşe töbäklärdä tabılğan qarawçısız sabıylarnı da şuşında kiterälär. Biredä alar, 3-4 yäşqä qädär yäşi, annan soñ, sabıylarnıñ yazmışın – däwlät xäl itä.
Ramazan ayınıñ soñğı könnärendä, 1nçe nomerlı bala yortının kürep qayttıq. İrtänge yaqta, işek aldında çirat xasil bulğan ide. Pensiä yäşendäge apalar, abıylar, keçkenä törgäklär belän kilgän. Kemder iske bala kiemnären alıp kilgän, kemder - 1 kilo peçenye. Äyberlärne tapşıra torğan bülmädä, här kilgän keşedän, isem- familiäne sorıylar, yazıp alalar. Härkemne, räxmätlär uqıp, ozatıp cibärälär. Bala yortındağı şäfqät tutaşı äytkänçä, sabıylarnı aşatır öçen, qıybatlı bala riziqların alar ala almıylar, şuña, andıy äyberlärne alar bik teläp qabul itä. Yaña tuğan balalarnı qaraw äyberläre dä kiräk, närsäne kitärä alalar, barısın da tababız, didelär bala yortı xezmätkärläre. «Azatlıq» xäbärçese bala yortında bulğanda, anda prännek, ciläk-cimeşlär belän paketlar, bala riziqları kürende. Bäyrämnär waqıtında kilüçelär ayıruça küp bula, dide bezgä bala yortı baş tabibı Lubyakin Sergey äfände. «Dini bäyrämnär waqıtında märxämätlek kürsätüçelär ağımı arta, älbättä. Ämma başqa waqıtta da kilälär, qızıqsınalar, xälennän kilgänçä, yärdäm itüçelär dä bar. Qazan xalqınnan yärdämne daimi sizep yäşibez»- dide ul.Balalarnıñ millätläre turındağı sorawğa baş tabib, bar millät wäkilläre dä oçrıy, dip añlattı. Urıs häm tatar isemnäre dä oçrıy, yahüd häm çegän balaları da bula, dide ul. Balanıñ milläten bilgeli almaw kebek qıyınlıqqa da oçrıybız, dide baş tabib Sergey Lubyakin.
«Bik küp oçraqlarda, bezgä kilgän balanıñ änise sabıynı taşlap, bala tabu yortınnan çığıp qaçqan bula. Üze turıda da, sabıye turıda da, ber nindi mäğlümat qaldırmıy. Bu mondağı balaqaylar öçen ğädäti xäl. Balanıñ tuu tırındağı tanıqlığına bez tögäl mäğlümat yaza almıybız, keşe süzennän, çamalap qına.» - dip söyläde baş tabib.
Anıñ äytüençä, oyışmanı tieşle xäldä totu öçen däwlättän birelgän aqçalar cittep bara, kiläse yılğa finanslaw ike tapqırğa artırıldı xätta, dide ul. Balanıñ kiläçäk yazmışın bilgeläwdä dä tabiplar qatnaşa, küpçelek sabıylarnı, bulğan ata-analarına, tuğannarına , ullıqqa, qızlıqqa birergä tırışabız, dide baş tabip.
Qarawçısız qalğan bala yortı, ber qayçan da, buşap tormıy. Kitkännär urınına yañalar kilep tora. Bu bala yortıda ğına da, taşlanğan balalar sanı ber yılğa, urtaça 50dan alıp 80 qädär yaña isemgä arta bara.
Bikä Timerova