Accessibility links

Кайнар хәбәр

30 Awgust bäyrämeneñ ataması üzgärtelde


Ozın-ozaq yal könnären istä totıpmı, deputatlar utırışta, aktiv töstä bäxäsläşte. Kön tärtiben tözegändä, härber sorawnı qarağanda da. İñ berençe itep deputatlar, munisipal xakimiätkä başqarma komitet başlıqların saylaw öçen cawaplı keşelär isemlegen rasladı. Alar, citäkçe keşelärne bäyge räweşendä yarıştırıp saylarğa tieş bula. Bäyge komissiäse ictimaği oyışma häm däwlät wäkillärennän torırğa tieş. Aldan saylanğan, tikşerelgän komissiägä äğzälärne Prezident täqdim itkän häm deputatlar ul isemlekne bertawıştan raslap quyğan.

Däwlät Şurası utırışında şulay uq, Tatarstannıñ sotsial iqtisadi üseş programması da qaraldı. Deputatlar Atom stansiäsen tözü turındağı qaranı programmadan aldı. Yäğni AESnı tözemäw turındağı qarar qabul itte. Läkin anıñ qarawı, Tübän Kama elektr-stanisiäsen tözep beterü turındağı mäsälä, sotsial-iqtisadi üseş programmasında qaldı. Deputat Ştanin, su bieklegen kütärügä qarşı çığıp, 1991 yılda komissiä 62 metr däräcäsendä qaldırığa, dip tikmägä xäl itmägänder, dip belderde. Premier-ministr Röstäm Miñnexanov, Samarada fänni institut bu mäsäläne tikşerä, dip añlatmalar birde. Anıñ äytüençä, su bieklegen 62dan 68 metrğa qädär kütärergäme-yuqmı digän mäsälä, axırğaça äle xäl itelmägän. Deputatlar tikşerüne däwam itärgä digän qarar qabul itte.

Annan soñ, «30 Awgust, Tatarstan Respublikası tözelü könen yal köne itep iğlan itü turında»ğı qanunğa tözätmälär qaraldı. Qanun proyektın deputatlar iğtibarına täqdim itkändä, komitet başlığı urınbasarı Galina Fäxretdinova, üzgäreş kertüne, prokuror protestları, Yuğarı mäxkämä qararları belän añlattı. Üzgäreş isem alıştıruda ğına ikän. Yäğni, qanunda 30 Awgustnı, «däwlät suverenitetı» köne itep tügel, ä «suverenitet turında deklaratsiä qabul itkän kön» itep atarğa täqdim itelä. Komitet başlığı urınbasarı Galina Fäxretdinova äytkänçä, bu üzgäreşlär belän deklaratsiä tarixi yaqtan ähämiäten yuğaltmıy, bu atama barı tik qanunğa tögällek kertü öçen kiräk. Deputat Tälğät Abdullin moña qarşı çıqtı, suverenitet ta birmilär, bulğanın atarğa da röxsät itmilär, dip belderde. Tatarstanda referendum buldı, bu - kolonizatsiä, nigä bu mäsäläne bez Strasburgta qaratmıybız, digän soraw birde. Parlament räise Färit Möxämmätşin, sezneñ Srasburgqa möräcäğät itü xoquqığız bar, räxim itegez, dide. Deputatlar başqa bu mäsälädä bäxäsläşmäde, qanunnı berençe uqılışta qabul itte.

Bikä Timerova

XS
SM
MD
LG