Accessibility links

Кайнар хәбәр

Dönya möselmannarı Ğäyet äl-Fitrnı bäyräm itä


Dönyanıñ küp kenä möselman illärendä Ramazan ayı tämamlanu uñayınnan bügen 3 könlek bäyräm başlandı. Ğiraqta sönnilär häm şığıylarnıñ ber öleşe bügen Ğäyet äl-Fitrnıñ berençe könen bäyräm itte. Ämma ildäge şığıylarnıñ küpçelege anı irtägä genä bäyräm itä başlıy. Bağdad yaña höcümnär mömkinlegen kimetü öçen küp kenä urınnarda tikşerü qapqaları buldırıldı. Älegä zur höcümnär turında xäbärlär bulmadı. Tatarstan, Başqortstan, Rusiäneñ törle awıl-şähärlärendä, Üzäk Aziä, Törkiä, Äfğänstanda bügen bäyräm çaraları ütte. Zilzilä kiçergän tönyaq Paqstanda isän qaluçılar Ğäyet äl-Fitrnı irtägä bilgeli. Ämma anda ul bäyräm çaraları belän tügel, ğäyet namazları belän bilgeläp üteläçäk. Anda qışqı suıqlar yaqınlaşqanda küplärneñ äle dä sıyınır urını yuq. Äfğänstan prezidentı Xämit Qarzai "Kiçä barlıq Äfğän xalqın Ğäyet uñayınnan qotlağanda min Paqstanda cir teträw näticäsendä 73 meñnän artıq keşeneñ hälak buluı turında işettem. Alla alarnıñ qayğısın şatlıqqa äylänersen, aldağı qışta alarğa iminlek häm yaxşıraq tormış birsen" dide. Mäskäwdä Rusiä möftilär şurası räise Rawil xäzrät Ğäynetdin bäyräm çığışında millätara çıdamlıqqa çaqırdı.
XS
SM
MD
LG