Uraza bäyräme Omskida bıyıl da küp keşe qatnaşlığında kürkäm ütte. Ölkäneñ awıl-rayonnardağı ğibädät yortlarında da, şähärneñ 5 mäçetendä dä ğädättägeçä wäğäzlär söylände, ğayıd namazları uqıldı. Omskinıñ cämiğ mäçetendä söylägän wäğäzendä Seber yağı diniä nazäräte möftie Zölqärnäy xäzrät Şakircanov ramazan ayında bıyıl mäçetkä yäşlärneñ ayıruça küp yörülären bilgeläp ütte. “Şöker, qartlarıbızğa almaşqa yäş buın üsep kilä, älxämdülillähi saflarıbız yıldan-yıl arta bara, kiläçäktä dä mäçetlärebez buş tormas”, - dide. Yäşlär arasında mäçetkä yärdäm kürsätüçelärneñ küp buluın da assızıqladı möfti.
Ğayıd könnärendä Omski möselmannarına bäyräm büläge itep, “Umırzaya” tatar-başqort ansamble maxsus konsert äzerläp kürsätte. Konsert programması asılda tatar xalıq cırlarınnan, iyüllärennän, mönäcätlärdän, dini häm milli temalarğa bağışlanğan şiğerlärdän tordı.
Rusiäneñ başqa şähärlärendä kebek, Omskida da 4 noyäberdä berençe märtäbä yaña bäyräm - “Xalıqlar berdämlege köne” bilgelände. Bäyräm uñayınnan törle çaralar oyıştırıldı: ölkä zakon çığaru cıyılışı binası qarşısında miting uzdı, klublarda, mädäniät yortlarında milli kollektivlar qatnaşlığında konsertlar kürsätelde, küp mäktäplärdä millät-ara duslıq temasına bağışlanğan çaralar oyıştırıldı . Alar eçtälekläre yağınnan elekke yıllardağı ideologik tärbiä çaraların xäterlättelär. Omskinıñ 94-nçe mäktäbendä, mäsälän, Seberdä yäşäwçe xalıqlar mädäniäte yärminkäse oyıştırılğan ide. Yärminkä seberdä yäşäwçe xalıqlarnıñ berdämlegen kürsätü niätennän oyıştırılğan bulsa da, anda asılda rus xalqı mädäniäte kürsätelde. Şulay da anda qatnaşuçılarnıñ tatar xalqınıñ milli kiemnäre, cır-iyülläre belän tanışu mömkinlekläre dä buldı. Alarnı, oyıştıruçılar sorawı buyınça, tatar şähär milli-mädäni moxtariäte aktivistları kürsätte.
Menä şundıy, asılda östän cibärelgän kürsätmälär buyınça oyıştırılğan, bäyräm araları bulıp uzdı Omskida. Döres, küplär bu könne bäyräm köne itep tügel, ä ğädäti yal köne kebek qabul itkän. “400 yılğa yaqın waqıt uzğan, xäzer genä bäyräm itä başlaw, añlaşılmıy. Min bügen konsertta da buldım. Läkin ber dä bäyräm xise kiçermädem”,- dip bäyrämgä qarata fikeren belderde ber yäş millättäşebez.
Sania Mirxalieva, Omski.