Baqı -- Azärbaycan üzäk saylaw komissiäse ike saylaw bülgesendä (Sumgait häm Binaqadi bülgesendä) yäkşämbe parlament saylawları näticälären köçennän çığardı. Monnan tış, Suraxani bülgesendä, 28 urınnıñ 10nda näticälär şulay uq köçtän çığarılğan. Anda oppozitsiä citäkçese Ali Kärimle köräşte. Räsmi näticälärgä qarağanda parlamenttağı urınnarnıñ kübesen xakimiättäge Yaña Azärbaycan partiäse alğan. Oppozitsiä bu näticälärne kire qaqtı, küp sanlı tärtip bozular turında äytep, qabat saylawlar ütkärergä çaqıra. Yevropada İminlek häm Xezmättäşlek oyışması saylawlar xalıqara taläplärgä turı kilmäde dip belderde. Yevropa Berlege Azärbaycan räsmilären bar ğäyepläwlärne tikşerergä çaqırdı. Azärbaycan prezidentı İlham Aliev televidenie aşa yasağan çığışında qayber citeşsezleklär buluın tanıdı häm ğäyeplelärne cawapqa tartırğa wäğdä itte. "Azärbaycan prezidentı häm xökümäteneñ maqsatı – ğädel häm irekle saylawlar ütkärü ide. Şuña kürä min ayırım räsmilärneñ, bar näticälärne şik astına quyğan, qanunsız ğämällärenä yul quya almıym", dide Aliev.