Accessibility links

Кайнар хәбәр

Qazanda nigä tatarça söyläşmilär?


Munisipal saylawlardan soñ, Qazanda qızıq xäl kilep tudı. Elekke Qazan şähär şurası deputatları da, yaña saylanğan munisipal berämlek deputatları da ber ük könne utırışqa cıyıla. Sessiägä qädär, komissiä utırışları ike cirdä dä, ber-ber artlı bara. Deputatlar nigezdä ber uk keşelär bulğanğa kürä, qaysıberläre ike cirgä dä yörergä ölgermi, komissiä utırışlarına da kilmi. Çärşämbe könne, Qazan şähär deputatlar Şurasınıñ tel häm mädäniät komissiäse utırışı buldı. Anda deputatlardan barı ike genä keşe kilä aldı, ämma mäsälä barıber qaraldı. Deputatlar Qazan şähärendä yäşäwçe xalıqlarıñ tellären üsterü turındağı qararlarnıñ ütäleşen tikşerde. Milli eşlärne häm mädäniätne bağuçı komissiä utırışında, şähär idäräseneñ milli eşlär bülege xisap tottı.



Qazanda nigä tatarça söyläşmilär digän soraw, şähär häm respublika tel programmalarına kilep totaşa. Ä şähär däräcäsendä tellärne üsterü öçen maxsus programma 2002 yılda qabul itelgän bulğan. Programmanıñ ütäleşe öçen, şähär büdjetınnıñ çığımnar öleşennän 1% külämendä açqa bülenä. Bıyıl ul 18 millionnı täşkil itkän. Şähär idäräseneñ milli eşlär bülege başlığı Lenar Mansur ulı Säläxov äytkänçä, finanslaw soñğı yıllarda azayğan. Qazan şähär şurası deputatları qabul itkän qararlar nigezendä, başqalada milli tellärne üsterü yünäleşendä iñ küp eşlär mäğärif ölkäsendä alıp barıla. Milli tellärne öyränü öçen yäkşämbe mäktäpläre eşen däwam itkän, mäktäplärdäge tuğan yaqnı öyränü muzeylarına cihazlar alınğan, yıl uqıtuçısı bäygese uzdırılğan, tatar virtual gimnaziä oyıştırılğan, çittäge tatarlarğa yärdäm kürsätelgän, häm başqa, häm başqa şundıy çaralar ütkärelgän. Milli eşlär bülege başlığı äytkänçä, ütkän yılda, toraq-kommunal xucalıq ölkäsendä eşläwçelär tatar telen öyränü kursların ütkän, başqa ölkälärdä eşläwçelär dä daimi kurslardan uza. Alalarğa tatarça möräcäğät itsälär, alar cawap birä alaçaqlar, dide Lenar äfände. Anıñ süzlärençä, tellärne üsterü programmasında qaralğan mäs’älälärneñ küpçelege ütälä. Ayırım mäs’älälärdä, mäsälän, elmä taqtalarda tekst ber genä telgä bula, yäki yul kürsätkeçläre, urıs telendä genä yazılğan oçraqlarında programmanıñ ütälmäwe kürenä. Lenar Säläxov añlatqança, milli bülek bu citeşsezleklärne beterüne taläp itärgä cıyına. İke däwlät telen belgän keşelärgä 15% östämä tüläw waqıtlıça tuqtatılğan, ämma Tatarstan xökümäte belän tüläwne däwam itterergä digän söyläşülär bara, dokumentlar kileşterelä, dide bezgä Qazan şähär idäräseneñ milli eşlär bülege başlığı Lenar Säläxov. Qazan şähär deputatlar Şurasınıñ pänceşämbedä bulası utırışta, milli eşlär bülegeneñ xisabı da täqdim iteläçäk. Anda finanslaw mäsäläläre xäl itelerme yuqmı, älegä bilgesez, ämma programmanıñ ütäleşe öçen salınğan byudjet çığımnarı isemlegenä, ike däwlät tellären belgän keşelärgä 15% tüläwne alıp barırğa digän täqdim kertelgän.

Bikä Timerova.

XS
SM
MD
LG