Accessibility links

Кайнар хәбәр

Rusiä natsional-bolşevikları Putingä qarşı köräşen däwam itä


Sişämbedä Mäskäwdä yänä yamanatı taralğan natsional-bolşevik partiäseneñ berniçä tarafdarı qtotqarlandı, alar parlamentnıñ yuğarı pulatı - Federatsiä Şurasına häm prezident idaräsenä maxsus möräcäğät tapşırırğa telägän bulğan. Şul möräcäğättä natsional-bolşeviklar Vladimir Putinne avtoritar cinayätçel idarä urnaştıruda ğäyepli.

Natsional-bolşeviklar partiäseneñ citäkçelege süzlärenä qarağanda, bäreleşlär, 40-lap tarafdarnıñ Federatsiä Şurasına kerergä tırışuı waqıtında başlanıp kitkän, iminlek xezmäte alar yulın yabarğa tırışqan. Törkemdäge natsional-bolşeviklarnıñ yartısı alay da bina eçenä ütep kerep, üz möräcäğäten deputatlarğa tapşıra alğan, anda alar Vladimir Putinne Rusiä watandaşlarına qarata 10 citdi qanun bozuda ğäyepli. Şular arasında prezident häm parlament saylawlarında xärämläşülär oyııştıru, Beslandağı mäktäp häm Dubrovkadağı teatr faciğäläre waqıtında totıqlarnı üterügä öleş kertü, üzenä 50 million dollarlıq zatlı köymä alu häm ildä avtoritar cinayätçel idarä urnaştıru kebek ğäyepläwlär bar. Moñardan tış Putin natsional-bolşeviklar möräcäğätendä Rusiädä bäysez mäğlümat çaraların awızlıqlawda häm äle sovet çorınnan qalğan qulaylıqlarnı beterüdä dä ğäyeplänä.

Federatsiä Şurasına şuşı möräcäğäten tapşıru belän bergä, natsional-bolşeviklarnıñ ikençe ber törkeme prezident idaräseneñ säyäsi ezärlekläw qorbannarın aqlaw komissiäsenä dä ayırım ber xat birergä tırışqan. Partiä citäkçeläreneñ berse Vladimir Abel radiobızğa, şul ikençe xatta, elegräk qulğa alınğan häm xökem itelgän natsional-bolşeviklarnı azat itü taläbe bar ide, bez alarnı säyäsi totqınnar dip isäplibez, dide:

"Alarnıñ öndämäsendä töp basım Rusiä törmälärendä totılğan natsional-bolşeviklarnı azat itügä yasalğan ide, tulayım alğanda bezdän 49 säyäsi totqın bar. Öndämädä şulay uq Rusiädäge bar säyäsi totqınnarnı azat itü häm ildäge säyäsi zolımnı tuqtatu kiräklege turında äytelä", di natsional-bolşeviklar partiäse citäkçeläreneñ berse Vladimir Abel.

Älege partiäneñ danı şundıy qıçqırıp torğan protest çaraları oyıştıru nigezendä taralğan ide, alar üz köndäşlärenä häm säyäsi doşmannarına açıqtan-açıq höcüm itä. Şul maqsatta yış qına kükäy, pomidorlar häm xätta mayonez da qullanıla. Natsional-bolşeviklar partiäse zamanında neofaşist oyışma bularaq barlıqqa kilgän ide, xäzer isä alar üzlären demokratiäne yaqlawçı oppozitsiä törkeme itep kürsätergä tırışa.

Bıltır awgust ayında natsional-bolşeviklar Vladimir Putinneñ säyäsi reformalarına protest yözennän prezident idaräse binasına bärep kergän ide. Şunıñ näticäsendä 39 keşe qulğa alındı, alar "xakimiatne yawlap alırğa tırışuda häm kiñküläm çualışlar oyıştıruda" ğäyeplände.

Partiäneñ şundıy şikle alımnar qullanuı säbäple Rusiädäge säyäsi küzätüçelär anıñ eşçänlege, maqsatları häm ähämiate turında qarşılıqlı fikerlär belderä. "Heritage Foundation" üzägeneñ Mäskäwdäge mödire Yevgeni Volk natsional-bolşeviklarnı bik şikle maqsatlı häm totrıqlı bulmağan ber partiä dip bäyäli. Ä menä Carnegie üzägendäge Nikolay Petrov isä anıñ belän kileşmi:

"Natsional-bolşeviklar Rusiä säyäsi qırındağı keçkenä genä ber kisäk, ämma alar Kreml qulı astında tügel. Alarğa Duma känäfiläre kiräkmi häm şuña kürä dä alar niçek teli şulay eş itä ala. Natsional-bolşeviklar Rusiä partiäläreneñ inde qorığan ağaçında yäşel kileş bik az ğına qalğan botaqlarnıñ berse, şuña da aña daimi basım yasala", dip belderä Nikolay Şmelev Rusiäneñ natsional-bolşeviklar partiäse turında.

Kärim Kamal
XS
SM
MD
LG