Noyäberneñ cidesen bıyıl yal itmäde xalıq, eş köne buldı. Kalendar''dan sızılıp taşlansa da kommunistlar Böyek Oktäber inqilabın üzlärençä zurlap uzdırdı. Noyäberneñ cidesendä köndezge säğät 11- dä Samarnıñ üzäk mäydanına qızıl bayraqlı kommunistlar, aq bayraqlı sotsial- demokratlar, qara bayraqlı yevraziä oyışması yegetläre- qızları, qızıllı- qaralı bayraqlı natsional- bol''şeviklar ber- berse belän butalmıy ğına üz şaqmaqlarına bastılar.
Bol''şeviklar kütärgän transparantlarda ällä ni yañalıq sizelmäde: “Sovetlar Soyuzı- torğızılaçaq”; “Zavod, fabrikalar- xalıqqa, cir- krästiängä!”; “Böyek Oktäber revolyutsiäse – mäñgegä böyek”; “Taptalğan Rusiä, uyan!” häm şundıyraq şiğar''lär.
Natsional- bol''şeviklar qap- qara zur tasmağa ap- aq xäreflär belän “Долой царя!” dip yazğannar. Tasmanı dürt yäş qız kütärep toralar, dürteseneñ dä awızında tämäke. Minem: “Qızlar, “Долой царя!”nı niçek añlarğa?”- digän sorawıma, dürtese dä berawızdan “Doloy Putina” dip añlağız”,- didelär. Mönbärgä berse artınnan berse kütärelde: artist, böyek Watan suğışı veteranı, profsoyuz citäkçese, şağir, deputat, yäşlär. Fikerlär ber- bersenä täñgäl ide.
Zur mäydandağı xalıq arasında bigräktä üzläreneñ qiäfätläre belän “yevraziä”yäşläre ayırılıp tordı.
“Bezneñ ideologiä- Stalin natsional- bol''şevizmı belän sotsializm quşımtası, maqsatıbız- yevraziä imperiäsen tözü. İmperiäneñ nigezen ruslar täşkil itäçäk, ä qalğan millätlär ruslar arasında erep yuğalaçaqlar. İmperiä üzeneñ çiklären Tın okeannan Atlantik okeanğa qädär cäyelüne maqsat itep quya. İmperiä çiklären kiñäytep tormasa ul üzeneñ imperiälegen yuğalta”,- di yap- yäş yeget. Samardağı yevraziäçelär üzlären natsional- bol''şeviklarnıñ un qanatları dip sanıylar. Yevraziäçılarnı rusça söyläşmägän, ä üz milli tellärendä söyläşüçelär, cennären küpertälär ikän.
Çığıp söyläwçelärneñ barçası da 7-nçe noyäberne kire bäyräm itep qaytarunı taläp itte.
4-nçe noyäber- berläşü könendä döres tügel dip sanadılar, xalıqnı tik Böyek Oktäber inqilabı ğına berläşterä dip oran saldılar.
Samar şähär Duma deputatı, komsomol Sergey Orlov, Guberna Duma deputatı Svetlana Kuz''mina, profsoyuz citäkçeläreneñ berse Vladimir Avdeev häm başqalar çığış yasadı. Natsional- bol''şevik firqäse äğzası Dmitriy Doroşenko çığışı ayıruça tä''sirle buldı.
“ Xakimiät yaña revolyutsiädän qurqa. Samarda demonstratsiägä çığuçılarnı taratu buyınça daimi öyränülär uzdırıla. Alar bezne zindannarğa ırğıtalar, bezgä qarşı köç qullanalar. Bezne qinıylar, torğan işek-allarıbızda saqlap toralar. Xakimiättägelärne kisätäbez, uñ bitebezgä suqqanda sulın quyıp tormabız! Revolyutsiä utı yaña köç belän qabınsın!”- dip äytügä natsional- bol''şeviklar mäydanda şaşkalar qabızdılar. Dörläp utlar yanıp tordı, töten dulqını taraldı. Xalıq ükerä başladı:
“REVOLYUTSİÄ! REVOLYUTSİÄ! REVOLYUTSİÄ!
Noyäberneñ cidese qarşı töndä cirle televidenie Samarda avtobus, tramvay, trolleybus, metroda ber utıruğa bilet bäyäse 9 sum bulaçaq, dip xäbär itte. Yaña yıldan keşelär fatir xaqın tulısınça tüläyäçäklär, dotatsiä beterelä, yağulıqqa, çuyın yulında, energetikada häm başqa tarmaqlarda xaqlar kütäreläçäk dip xäbär itte Däwlät Duma deputatı Valentın Romanov. Miting Vladimir Putin adresına rezolyutsiä qabul itü belän tämamlandı.
Şamil Bahautdin, Samar