Elektron gäzitlär bulğan zamanda da, käğäz gäzitlär üzläreneñ aktuallegen yuğaltmıy. Ämma alarnı öygä aldıru eşendä dä, internet yärdäm itä ala. Yaratıp uqıy torğan gäzitlärneñ kübeseneñ, internet bitläre bar, anıñ östäwenä, gäzitlärgä internet aşa da yazılırğa mömkin.
www.izvestia.ru saytında mäsälän, «İzvestia» gäziten uqırğa bula, www.rt-online.ru säxifäsendä «Respublika Tatarstan» gäzite belän tanışu mömkin. www.vatantat.ru saytında «Watanım Tatarstan» gäzite urnaşqan. www.sabantui.ru säxifäsendä babalar gäzite yazmaları belän tanışıp baru mömkin. www.suyumbike.ru adresın cıyıp, xatın-qızlar jurnalın tabarsız. www.tatyash.ru internet säxifäsendä «Tatarstan yäşläre» gäzite bulır. Gäzitlärneñ internet säxifäläre barın bar, ämma çınlıqta, alarnıñ küpçelegeneñ internet bitläre daimi yañartılıp barmıy. Mäsälän, «Söyembikä» jurnalınıñ internet säxifäsendä, fevral ayında çıqqan sannarın berniçä mäkälä urnaştırılğan. Yazılu öçen xättä kvitansiä dä bar, ämma ütkän yartı yıl öçen genä. «Watanım Tatarstan» gäziteneñ internet säxifäsendä, soñğı yazmalar belän tanışıp barıp bula, ämma yazılu öçen on-line şartlar tudırılmağan. «Sabantuy» gäziteneñ internet säxifäse ni säbäpleder açılmadı, şuña kürä anıñ yazmaları belän internetta tanışu turında älegä äytü qıyın. Tatarstan poçtası internet aşa yazılu xezmäten açu turında iğlan itkän ide häm bu xaqtağı mäğlümat daimi räsmi çığışlarğa kertelä. Baqsaq, www.tatpochta.ru säxifäsendä internet-xemzätlär digän bülek bar, anda internet aşa gäzit-jurnallarğa yazılu digän bülek täqdim itelä. Ämma küpme genä ul bülekne açıp, yazılıp qararğa teläsäk tä, kilep çıqmadı. Älege internet-yazılu digän bülek eşlämi bulıp çıqtı. Şuşında uq, www.kazan.ru/podpiska digän säxifägä kerep,andağı podpiska, yäğni yazılu bülegenä totaşırğa täqdim itelä. İnternet aşa yazılu turında älegä, Mäskäw poçtasınıñ internet säxifäsendä genä mäğlümat taptıq, www.gazety.ru saytı Mäskäw öçen genä eşli bulıp çıqtı. Şulay itep, tatar gäzitläre internetqa barmı digän sorawğa – äye dip cawap birep bula, ämma alarğa yazılırğa mömkinme digän sorawğa älegä yuq, dip cawap biräbez.
Bikä Timerova.