Accessibility links

Кайнар хәбәр

Rusiäneñ yuğarı citäkçelegendäge äweş-täweş kiläse prezident xaqında yaña imeş-mimeşlär tudıra


Rusiä prezidentı Putinneñ üzenä yaqın ike xezmättäşen xökümät citäkçelegenä quyuı anıñ 2008-nçe yılda uzaçaq çirattağı prezident saylawlarına waris äzerli başlawın añlata digän farazlar çığuğa kiterde. 2000-nçe yılda Dmitri Medvedev Putinneñ saylawaldı eşlären alıp barğan ide, tağın 3 yıldan soñ ul prezident idaräsen citäkli başladı. Saqlanu ministrı urının saqlap, xäzer inde vitse-premyer itep bilgelängän Sergey İvanov turında isä küptännän Putinneñ yaqın dustı häm ixtimal warisı bularaq söylänep kilde.

Rusiädä näwbättäge prezident saylawlarına äle 2 yıl yarım waqıt qalsa da, Vladimir Putinneñ il citäkçelegen kötmägändä şulay äweş-täweş kiterüe Mäskäwdä kiläçäk waris turında yaña imeş-mimeşlär dulqının kütärde. Putin çınnan da öçençe märtäbä prezident bulu niätennän waz kiçteme? Xäzer inde ul cirlekne yäş, eşlekle wä liberal Dmitri Medvedev öçen äzerlime? Ällä inde haman da küz aldında xakimiatne üzenä yaqın torğan Sergey İvanovqa tapşırunı xup küräme? Rusiä säyäsi qaymağın xäzer menä şundıy sorawlar borçıy.

Törle farazlar, şik-şöbhälär öçen urınnı Putin üze dä şaqtıy qaldırdı, düşämbe xökümät utırışında yasağan belderüendä ul alda torğan saylawlarğa bernindi dä işarä yasamadı, barı tik xökümätne nığıtu kiräklegen genä bilgeläp ütte häm bu eştä Medvedevkä zur ömetlär bağlanuın belderde:

"Min baştan uq sezgä töp eşneñ Rusiä xökümätendä alıp barılaçağın äytep kildem, şuña kürä min premyer-ministr täqdimen qabul ittem, şunıñ nigezendä Dmitri Medvedev premyernıñ berençe urınbasarı bulıp xökümätkä küçä", dide Vladimir Putin.

Medvedev üzeneñ yaña eşenä Rusiä yağulıq industriäsendä tuplağan bay täcribä belän kilä. Rusiäneñ iñ ere şirkäte - "Gazprom"nıñ idarä şurasın citäklägän Dmitri Medvedev üzen şul eştä sälätle idaräçe häm osta säyäsätçe itep kürsätte. Mäskäwdäge Carnegie üzäge xezmätkäre Nikolay Petrov, ul xökümätkä uñay çorda kilä, dip isäpli:

"Ğomumdäwlät proyektlarnı ğämälgä quyunı häm bar xökümät eşen küzätep torğan Medvedevkä xäzer inde bu eşne üze alıp barırlıq räsmi wäkalätlär birelä. Şul eşendä ul üzen cämäğätçelekkä kürsätä başlayaçaq häm tanılaçaq, çönki xökümät aldında caylı waqıt tora - bar tiskäre närsälär häm reformalar yä kiçekterelde, yä tämam tuqtatıldı", dip añlata Dmitri Medvedevne kütärü ixtimalı xaqında Nikolay Şmelev.

Läkin Vladimir Putin xökümätkä Medvedevne cibärü belän genä çiklänmi, ul anda üzeneñ dustı sanalğan Sergey İvanovnı da nığıta, saqlanu ministrı urının saqlap qalğan İvanov premyer-ministr urınbasarı itep bilgelänä. Küzätüçelär, Vladimir Putin şulay itep, üz warisı bularaq älegä ayırım ber keşene kürmäwenä işarä yasap, mömkin nämzätlär arasınnan iñ layıqlısın cämäğätçelekneñ üzenä saylaw mömkinlegen birä, dip isäpli. Rusiäneñ ictimaği säyäsät üzägennän Svätoslav Kaspe:

"Bu keşelär - Medvedev häm İvanov - xalıq tarafınnan inde küptännän Putin tirälegennän buluları belän tanılğan ide. Şuña kürä bez xäzer şunı äytä alabız - alarnı yaña urınnarğa quyu yaña çor başlanuın añlata, waris buluğa däğwa itüçelär cämäğätçelek yaqlawın qazanırğa tieş bulaçaq", dip belderä Svätoslav Kaspe.

Kärim Kamal
XS
SM
MD
LG