Ğadi keşelärneñ öylärendä dä, däräcäle eş bülmälärendä dä, Qazanda häm respublikada da Kamil İsxaqovnıñ başqaladan Yıraq Könçığışqa kitüe xaqında söyläşülär xäzer. Sişämbe irtäsendä, Qazan aeroportında Kamil İsxaqovnı Mäskäwdän qaytqanda, jurnalistlar kötte. Şuşında uq, matbuğat oçraşuı ütkärelde. Berençedän jurnalistlar, Kamil İsxaqovnıñ käyefläre belän qızıqsındı. Ul törle-törle xislär kiçeräm, şatlıqlı da, qızğanıç ta, dide. Kamil İsxaqov ğailäse turında da äytep kitte. Xatınım da, balalarım da bu üzgäreşne bik añlap, qabul itte dide Kamil İsxaqov. Dönya Bankı birä torğan kreditlarnı faydalanu eşe däwam iteläçäk häm bu urında qalğan keşe barlıq başlağan eşlärne däwam itäçäk dide ul. Qazan şähär başlığı bulırlıq şäxeslär citärlek, Prezident belän kiñäşläşep xäl itärbez, dip cawapladı. İnde 19nçe noyäberdä uk, Kamil İsxaqov Qazannan kitärgä cıyına. Xabarovskiyda qayda yäşäyäçägen äle belmim, arendağa fatir alıp torırmın, eş xaqı nindi bulır älegä belmim, dide ul. Kamil İsxaqov Qazanğa qartlıq könendä qaytaçağın wäğdä itte. Qazan häm İsxaqovnı ayırılğısız töşençälär dip qabul itärgä öyrängän keşelär öçen berençe reaksiä şok bulsa, xäzer küplär kiläçäkkä qarıy. Rusiä qısalarında Rusiä Prezidentına almaşqa kiläse şäxes turında söyläşälär, Tatarstanda isä şähär başlığınıñ alışınuı häm anıñ näticäläre turında söyläşälär. Qazanda bilgele jurnalist Raşid Äxmätov, Qazan häm respublika xakimiätläre arasındağı kierenke mönäsäbätlär turında küp mäqälälär avtorı, İsxaqovnıñ kitüen, böten yaqtan uñay itep bäyäli. Anıñ fikerençä, kitü kierenkelekne beteräçäk, Tatarstanğa qarata bu İsxaqovnıñ säyäsi sörelüe, ä anıñ üze öçen, zur karyera üseşe, di Räşit Äxmätov. Anıñ fikerençä, Kamil İsxaqovnıñ Tatarstanğa Prezident bulıp äylänep qaytuı ikele. Çönki ul töbäkneñ problemalarına kerep batarğa mömkin.
Raşit Äxmätovnıñ äytüenä qarağanda, xäzer Qazanda üzgärtep qoru waqıtı citte. Şähär citäklelegenä yaña häm yäş kilsä, şähär üseşe öçen yaxşıraq qına bulaçaq, dip sanyı Räşit Äxmätov.
Tatarstan räsmilärennän bu mäsälä Färit Möxämmätşin ğına fikeren belderde. Ul, İsxaqovnıñ alay yıraqqa kitep baruın kötmägän idek, ämma ikençe yaqtan, tatarstandağı citäkçeseneñ yuğarı urınğa bilgelänü - şatlıqlı xäl, digän Färit Möxämmätşin. Däwlät Şurası deputatları isä – şatlanabız, anıñ öçen, şähär deputatları arasında İsxaqovqa tiñ keşelär yuq digännär.
Bikä Timerova.
