6 Noyäberdä ütkän parlament saylawlarında oppozitsiä namzätläre – barlığı 500läp keşe – bügen Baqıda cıyılıp, räsmi näticälärne köçtän çığarırğa, qabat saylawlar ütkärergä taläp itte. Cıyılışta qabul itelgän urtaq belderüdä bu saylawlar ğädel tügel dip iğlan itelde. Räsmi näticälärgä kürä, Mäclestäge 125 urınnıñ yartısın xakimiättäge Yaña Äzärbaycan partiäse alırğa tieş. Könbatış küzätüçeläre dä bu saylawlar xalıqara taläplärgä turı kilmäde dip taptı. Yevropada İminlek häm xezmättäşlek oyışması wäkile Urdur Gunnarsdottir, bügen radiobızğa, bar şikäyätlär tikşerelep betkänçe bezneñ törkem Baqıda qalaçaq dip belderde. Bezneñ törkem tağın ike atnağa Baqıda qalaçaq. Bar şikäyätlär tikşerelep, axır näticä iğlan itelmiçä, saylawlar betkän dip äytep bulmıy, di Yevropada İminlek häm xezmättäşlek oyışması wäkile. Saylawlar ütkännän soñ Äzärbaycan räsmiläre 4 saylaw bülgesendä näticälärne köçtän çığardı.
