17 noyäber Xalıqara studentlar köne. Ul 1941 yılda Londonda uzğan faşizmğa qarşı köräşkän xalıqara studentlar oçraşuında oyıştırılğan häm Qarşılıq kürsätkän qaharmannar – Çexoslovakiä studentları istälegenä bilgelängän, şuña kürä yuğarı mäktäp uquçıları xalıqara teläktäşlege köne sanala. Bu uñaydan pänceşämbe könne Qazannıñ "Piramida" mädäni küñel açu üzägendä berençe tapqır "Yıl studentı" isemen tapşıru tantanası uzdı. Kiläçäktä älege isem yıl sayın bireläçäk dip kötelä. "Yıl studentı" iseme öçen sport, fän, icat, ğomumän alğanda, böten yaqtan da uñğan – bulğan studentlar yarışa. Şulay uq, studentlarnıñ teläktäşlek atnalığı qısalarında 16-17 noyäber könnärendä berençe tapqır Tatarstan studentlar ligası başlanğıçı buyınça töbäkara "Studentlar möxitendä narkomaniä probleması" isemle konferensiä ütte. Konferensiäneñ töp maqsatı - studentlarnı narkotiklar problemasın çişüdä aktivlaştıru. İke kön däwamında Rusiäneñ sigez töbägennän törle uqu yortlarınıñ altı yözgä yaqın studentı yäşlär arasında narkomaniäne kisätü buyınça sorawlarnı tikşerde. Konferensiädä studentlar narkotiklarnı qullanu säbäpläre, ğailä, islam - narkomaniäne kisätü çarası kebek temalarğa çığış yasadılar. Pänceşämbedä, studentlarnıñ ber öleşe bäyräm çaralarında qatnaşsa, ikençeläre isä ğädättägeçä uqıdılar. Gölnaz Şäyxetdinova
