Kamil İsxaqov Qazan başlığı bulıp torğanda Qazan üzgärde. Anısına süz dä yuq. Läkin milli xäräkät wäkilläre, tatar zıyalıları, Qazanda tatar ruxı yuğaldı dip küp märtäbälär häm yış qına belderülär yasıy kildelär. Qazannıñ meñ yıllığı bulsa da, Tatar bistäläre turında iskä aluçı bulmadı. Alar şul yarım cimerek xäldä. Döres, qayber tıqrıqlarğa tatar zıyalıları iseme birelgäläde. Läkin, prospekt belän tıqrıq ayırması zur şul. Mondıy misallarnı cämäğätçelek yış işette. Ä yaña mer kilgäç, Qazan küp millätle Tatarstan başqalası ğına tügel, ä tatarnıñ da dönyada berdänber başqalası ikänen istä totıp, Tatar ruxın iñderer öçen nilär qılırğa kiräk soñ? Azatlıqtağı Açıq mikrofon, şuşı sorawlar belän comğada Qazan xalqına möräcäğät itte.
- Min üzem Başqortstannan. Qazannı kürgänçe ük küñelem biregä tarta ide. Keçkenädän şulay öyrändem - Qazan ul Tatarstannıqı ğına tügel, ä çın tatar başqalası. Minemçä, üzgäreşlär kiräkmi.
- Monıñ öçen barlıq mäktäplärne tatar mäktäplärenä äyländerergä kiräk, tatar ğailälärendä balalarnı fäqät tatarça tärbiälärgä. Häm böten Qazan xalqı tatarça söyläsä, tatar moxitendä yäşäsä Qazan çınlap ta tatar başqalası bulaçaq.
- Radio-televideniäedä qızıqlı tatar tapşıruları kiräk. Bu eş uyın räweşendä barsa, xalıq anı yaxşıraq qabul itäçäk. Ä bolay köçläp, här cirdä tatar tele genä bulsın dip tırışsaq, näticäse bulmayaçaq.
- İñ berençe bulıp, tatar yäşlärendä häm ğomumän Qazan yäşlärendä tatar telenä, tatar millätenä mäxäbbät uyatırğa kiräk. İkençedän, Mäskäw bezne qısrıqlıy bit inde. Läkin şuña da qaramastan tatar mäktäplären, gimnaziälären beterügä yul birmäskä kiräk.
Al'bina Zäynulla
