Tatarstan başqalasında comğada töp säyäsi waqiğalar “Qazan” milli mädäni üzägennän ide. Eş şunda ki, monda Qazan şähär şurası deputatlarınıñ çirattağı 26 sessiäse ütte. Sessiä kön tärtibendä distädän artıq mäs’älä qaralğan ide. Alar arasında, cirle salım mäs’äläläre dä bar, transport eşen cayğa salu, cılılıq birüne kamilläşterü kebek kön qadağına suqqan problemalarnı da tikşerü qaralğan ide. Bu yıl axırında üz eşen tuqtataçaq şähär deputatlar Sovetı älbättä, bu mäsälälärne tiz arada ğına qarap çıqtı, aldan äzerlängän qararların da qabul itte. Läkin, töp mäs'älä, sep-sevijiy bilgelängän Qazan başlığı İlsur Metşinnı räsmi räweştä täqdir itü häm inde, Vladimir Putinnıñ cide wäkileneñ berse bulıp Yıraq Şärıqqa yulğa çığarğa äzer torğan Kamil İsxakov belän sawbullaşu ide. Tantanalı itep. Kamil İsxakov bit, ike distä yılğa yaqın Qazannıñ başlığı, ä şuşı şähär deputatları şurasınıñ räise bulıp tordı.
Kön üzägenä quyılğan mäs'älälär buyınça fiker alışırğa kereşkänçe,
Rusiä Prezidentınıñ Yıraq Könçığış federal' okrugındağı tulı wäqälätle wäkile Kamil İsxakov Qazan şähäre xalıq deputatların Qazannıñ yaña başlığı belän tanıştırdı. Häm üzeneñ yaña wazifağa bilgelänüe turında Kamil İsxakov tübändägeçä belderde:“ Miña yöklängän cawaplılıq bik zur. Xezmätemä yuğarı baya birgännäre öçen min bik tä söyenäm. Min bu uñışlarğa Sezneñ yärdämegez belän ireştem. Häm Yıraq Könçığışta da min sezneñ turında onıtmam häm sezneñ yözegezgä qızıllıq kitermäslek itep eşlärgä tırışırmın”.
İlsur Metşin, üz çiratında, aña birelgän yaña wazifanı zur cawaplılıq belän başqaraçağın, Qazanda traditsiälärne saqlap, däwamçalıq prinsibına tuğrılıqlı qalıp, ireşelgän uñışlarğa tayanıp eş itäçäge turında belderde. Häm üzeneñ berençe eş könen kadrlar bilgeläwdän başladı. İlsur Metşin üzeneñ berençe urınbasarı itep Qazan şähäre xakimiäte Apparatı citäkçese wazifasın başqarğan Röstäm Niğmätullinnı bilgeläde.
Sessiä utırışı tänäfesendä jurnalistlar belän fiker alışuda İlsur Metşin Qamil İsxakov belän eşlägändä, üzen yaxşı yaqtan kürsätkän komandanı alıştırırğa cıyınmawın häm kadrlar kiräk bulğan oçraqta ğına alıştırılaçağın bilgeläp uzdı.
Ä Kamil İsxakov isä üz çiratında äle Qazannıñ yaña saylanğan Şähär Duması utırışında qatnaşaçağın belderde. Anda ul räis bulıp tora. Qazan Dumasınıñı aldağı utırışında qatnaşaçağına ışandırdı.
Putinınıñ Yıraq Şärektäge wäkile Kamil İsxakov, şulay da, qartlıq könendä bulsa da, tuğan üskän cirlärenä qaytıp yağılırğa telägänen surätläp ük kürsätte.
Kamil İsxakov, şundıy tantanalar belän, şähär Şurasında sawbullaştı. Pänceşämbe kiçendä ul, yaña saylanğan häm şähär belän 2006 yıldan idärä itäçäk Qazan Duması belän dä sawbullaşu ütkärgän. Ülgän sıyır sötle ide, dip moñlanırğa yaratqan, qayber tatar matbuğatı çaraları pänceşämbe kiçendäge sawbullaşu çarası turındağı reportajlarında, xätta, tabiğät torışın da surätläp birdelär. Niçek itep disägez. Alay qurqınıç tügel süräläwläre. Tabiğät atna kiç moñsu torğan ikän. Kamil Şamil uğlınıñ kitüe uñayınnan inde digänräk mäğnädä.
Kamil İsxakov, comğada, elekkege şähär şurası belän sawbullaşqaç, Yıraq Şärıqqa, andağı federal' okrugnıñ başqalası Xabarovskiyğa oçtı.
İnde İlsur Metşinğa kilgändä. Ul, şulay itep, yaña yılğa qadär Mintimer Şäymiev tarafınnan bilgeläp quyılğan Qazan başlığı bulıp eşli başladı. Yaña yıldan soñ, bilgelängän şähär, rayon başlıqları, Respublikada qalmıy. Saylanğan glavalar eş yörtäçäk. Ä Metşin, yaña yılğa qädär genä tügel, annan soñ da şähär dä başlıq bulıp torırğa niätli. Döres, şähärneñ başqarma xakimiäte başlığı bulıp. Ä ul başlıqnı, konkurs aşa saylap alaçaqlar. Kemgä konkurs, yäki kem öçen konkurs dip şayartalar xäzer säyäsätkä yaqın keşelär. Çönki, Şäymiev bit, pänceşämbedäge tantanada, Metşinnı başlıq itep bilgeläw ozaq yıllarğa dip belderde. Tatarstanda saylaw belän saylanu arasında ayırma ällä ni kürenmi dip yazıp çıqtı ber matbuğat çarası, şunnan soñ. Şul uq waqıtta, Tübän Qamada, İlsur Metşin kitüe belän genä başsız qalmadı. Prezident, anda da yaña başlıq bilgeläde. Ul, 43 yäşlek, Tübän Qama neftexim şirkätendä general' direktor urınbasarı bulıp eşlägän Oleg Vlasov.
Räfis Cämdixan, Gölnaz Şäyxetdinova.
