Quşma Ştatlarda terkälgän Human Rights Watch keşe xoquqların yaqlaw oyışması bügen Rusiä iminlek köçlären uzğan ayda Qabarda-Balqar başqalası Nalçikka qorallı höcümdä qatnaşuda şiklänelep totqarlanğannarğa ğäyep tanıtu öçen tieşsez möğämälä kürsätüdä ğäyepläde.
Oyışma belerüendä kimendä 8 totqınnıñ qayber oçraqlarda azaplawlarğa duçar buluın raslawçı dälillär tuplanuı turında äytelä. Oyışma 13-nçe üktäberdäge höcümnän soñ qulğa alınğan elekke Guantanamo totqını Räsül Kudayevnı ayırım misal itep kiterä. Anıñ advokatı äytüençä, Kudayevnı qatı qıynağannar, häm 3 anta elek advokat belän oçraşqanda ul yöri almaslıq xäldä bulğan.
Rusiä prokurorları bu höcümdä qatnaşuda şiklänelep 50-läp keşeneñ totqarlanuın belderde. Ämma xoquq yaqlawçılar äytüençä, totqarlanuçılar sanı küpkä artığraq.
Räsmi sannarğa qarağanda Nalçiktağı atışlarda 140-lap keşe, şul isäptän 12 sivil hälak bulğan.