Tatar ictimaği üzägeneñ Yunıs Kamaletdinov citäklägän törkeme 19 noyäberdä plenum ütkärep, anda Rusiädä kadrlar alıştırunı tänqitlägän. Ägär dä general Pulikovskiy urınına Yıraq Şärıqqa täcribäle keşe cibärergä kiräk bulğaç, Qazan şähärendä saylaw uyınnarı ütkärep, deputat mandatı häm şähär başlığı çılbırın alğan keşene nigä inde çitkä cibärergä kiräk dip äytelä şuşı oyışma prezidiumı belderüendä.
Yunıs Kamaletdinov citäklägän BTİÜ qanatı Kamil İsxaqovqa uñışlar säyäsi tramplinnan sikerep tuğan cirgä tizräk oçıp qaytunı teläp qala. Şulay uq 19 noyäberdä ütkän cıyılışta Qazan Kirmänendä Blagoveçenie soborı yanında bieklege 60 metr, awırlığı 30 tonna bulğan tağın ber qıñğıraw tözügä borçılıp tiskäre mönäsäbät beldergännär. Bu turıda yasalğan ayırım belderüdä tarixtağı ciñülär häm ciñelülär turında äytä. Başqalarğa irek birsäñ, üzeñ dä azat bulırsıñ dielä anda. Yunıs Kamaletdinov imzası belän ul citäklägän BTİÜ qanatınıñ tağın ber möräcäğäte Qazan byurosına kilde.
Belderüdä üzäk kiläçäktä dä, Tatarstanda millätara häm dinnär arasında tınıçlıq bulsın öçen köräşäçäk. Respublikada bar xalıqlar da bertigez häm nindi genä böyek xalıq bulsa da, başqalarğa qarata östenlek itmäyäçäk dip äytelä.
Şulay uq Tatarstannıñ tellär turındağı qanunnıñ ütäleşen taläp itä, aña ayaq çalularğa qarata qatğıy belderü yasıy. Terror, millätara ızğışlar bulmasın öçen dä milli xäräkät böten köçen quyıp eşläyäçäk. Millätçelekkä, şul isäptän urıs şovinizmına da Tatarstanda urın yuq. BTİÜ Tatarstannıñ iğtisadi häm säyäsi bäysezlege öçen köräşen däwam itäçäk. Yunıs Kamaletdinov imzalağan bu belderüdä milli xäräkät äğzalarınıñ mitinglarğa, piketlarğa kilep üzläreneñ moñ – zarların, teläklären belderergä täqdim itälär.
Älege möräcäğät turında Tälğät Bariev citäklägän räsmi tatar ictimaği üzägeneñ fikere xäzergä bilgele tügel.
Gölnaz Şäyxetdinova
