Bıyıl Tatarstanda berdäm däwlät imtixanı tağın ike yaña fännän bireläçäk. Bu tatar tele häm biologiä fännäre. Uzğan yılnı mäktäp tämamlawçılar matematika, ximiä, fizika, rus tele buyınça berdäm däwlät imtixanı tapşırğanı mäğlüm. Alar arasında iñ zur bal cıyğannarı respublikanıñ yuğarı uqu yortına imtixansız kerü bäxetenä ireşte. Tatarstan Mäğärif häm fän ministrlıyğında älegä niqädär studentnıñ berdäm däwlät imtixanı aşa uqırğa kerüe xaqında mäğlümat birmädelär. Ul sannarnıñ soñraq bilgele bulaçağın äyttelär.
Bıyıl berençe tapqır bireläçäk tatar tele häm biologiä fäne buyınça berdäm däwlät imtixanı Tatarstan Rektorlar Şurası täqdime belän kertelgän. Dimäk tulayım alğanda respublika mäktäpläreneñ çığarılış sıynıf uquçıları barlığı 6 fän buyınça berdäm däwlät imtixanı birä alaçaq. Rus telennän qala başqa böten fännärne tatar telendä birü mömkinlege bar. Bıyılğı yañalıqlar turında Tatarstan Mäğärif häm fän ministrlığınıñ berdäm däwlät imtixanın oyıştıru bülege citäkçese İlnur Mirgalimov
Uzğan yıl bezneñ regional' imtixan dip atala ide, bıyıl respublika imtixanı dip atala. Anıñ nigezendä bezneñ TR Ministrlar Kabinetı tora, şuna respublika däräcäsendä genä uza. Ämma kiläçäktä tatar telendä imtixannı Tatarstannan çittäge tatar mäktäpläre dä birä alır dip uylıybız häm Rossiä töbäkläre belän söyläşülär bulaçaq.
Berdäm däwlät imtixanın üz tuğan telendä birgän uquçınıñ härqaysı respublikanıñ yuğarı uqu yortınıñ telägän fakul'tetına uqırğa kerä ala. Bu Tatarstan Prezidentnıñ Däwlät Şurasına yöklägän yullamasında da äytelgän. Rektorlar Şurası cıyılışında da moña basım yasalğan. Bar fännär buyınça da berdäm däwlät imtixanın birü materialları tatarça eşlänä.
Bıyıldan kerteläçäk tatar tele fäne buyınça berdäm däwlät imtixanı biremnären ğalimnär, mäktäp, yuğarı uqu yortları uqıtuçıları eşläyäçäk. Anda Tatarstannıñ Mäğärifne üsterü institutı da cälep itelä. Bu xaqta İlnur Mirgalimov
Tatar tele 3 programma nigezendä uqıtıla. Kontrol'-ülçäw materialların şul 3 programma nigezendä eşläw küzdä totıla. Uquçılar qurqıp qalmasqa tieş, barısı da mäktäp programması buyınça bireläçäk.Landış Xarrasova.
