Accessibility links

Кайнар хәбәр

Milli moñğa susağan millättäşlärebezgä qarata iğtibar arta


Bilgele bulğança, xäzerge waqıtta Qazaxstanda prezidentlıkqa saylaw aldı kompaniäse bara häm älege çara da näq şul waqıtqa turı kilde dä. Bügenge köndä Qazaqstanda 350 meñ millättäşebez yäşi. Şunlıqtan, “Duslıq küpere” bäyrämenä Tatarstannan 55 keşelek delegatsiäneñ kilüen, andağı millättäşlärebez bik söyenep qarşılağan. Bäyrämneñ niçek uzuı turında älege konsertnı alıp barğan El'za Äxmätcanova bolay dip belderde: “Anda bezdän küp kenä artistlar qatnaştı, äytik Liliä Göbäydullina, Röstäm Zakirov, El’mira Kälimullina, İlüs Ğilmanşin ,“Qazan yegetläre” törkeme häm “Qazan” biyu ansamle çığış yasadı. Monda xalıq bik küp cıyılğan ide, xätta basıp tordılar. Menä şuşı tatar cırına häm moñına susağan millättäşlärebez bik räxätlänep tıñlap utırdılar”. Ğomumän alğanda, Qazaqstan filarmoniäseneñ konsertlar zalı säxnäsendä yasalğan çığışlar ike kerdäş xalıqnıñ tatulığı, berdäm törki tamırlar, dustanä tormışı turında bulğan. Tamaşaçı ayıruça “Kazan” bayu ansamblen bik cılı qarşı alğan. Monıñ turıda Azatlıq radiosına Almati şähärendä yäşäwçe millättäşebez Grif Xäyrullin xäbär itte. Tatarstannıñ mädäniät ministrı Zilä Väliewa, Bötendönya Tatar kongressı citäkçese Rinat Zakirov, Tatarstannıñ Qazaxstandağı wäkälätle wäkile İldus Tarxanov Qazaxstanda küp kenä oçraşular uzdırğannar. Alar aldağı yıllarda ike respublika arasındağı xezmättäşlekne tağın da kiñäytü turında söyläşülär alıp barğan. Äytik, Qazaxstan Prezidentı apparatında eşläwçe millättäşebez Täwfıyk Kärimov, Qazaxstan ministrları belän bulğan oçraşuda süz ike respublika arasında xezmättäşlekne kiñräk cäyelderü, alarnı niçegräk oyıştıru turında barğan. Şulay uq, Qazaxstanda sibelep urnaşqan tatar ictimaği oyışmaları citäkçeläre belän berlektä biredä yäşäwçe millättäşlärebezne berläşterü, alar eşçänlegen ike respublika mänfägat'lärendä näticäleräk faydalanu xaqında söyläşkännär, dip xäbär itä Watanım Tatarstan gäzite. İñ möhime, Tatarstan häm Qazaxstan respublikaları arasındağı xezmättäşlekneñ kiñäytennän häm ike respublika Prezidentlarınıñ dustanä mönäsäbättä toruınnan, prezidentlıykqa saylaw aldı kompaniäse waqıtında milli moñğa susağan millättäşlärebezgä qarata iğtibar arta. Gölnaz Şäyxetdinova

XS
SM
MD
LG