İñbaşı Putinnıñ İdelbuyı Federal' okrugındagı yaña palnamuçı Aleksandr Konovalov okrugqa kergän töbäklär belän tanışuın Sember ölkäsennän başladı
Vizitnıñ töp maqsatı – krizisqa qarşı oyıştırılğan protsesslar belän tanışu, Sember ölkäseneñ yaña citäkçelege eşçänlegeneñ näticälelegen bäyäläw. Anıñça äytsäñ, “effektivnost' novogo menedjmenta”. Semberdän alğan berençe tä'sirläre turında jurnalist sorawına yaña citäkçe menä ni dide. “Qarañğıda ällä ni uñay tä'sir bulmağan ide. Ä köndez, bigräk tä matur qar yauğanda, yaxşı tä'sir yasıy. Ölkä dä, anıñ üzäge dä tarixi häm iqtisadi yaqtan danlıqlı traditsiälärgä iä. Töbäkneñ potensialı aña, dotatsiägä moxtac töbäklär isemlegennän çığıp, Rusiäneñ çäçäk atıp yäşäwçe töbäkläre isemlegenä kerergä mömkinleklär dä birä. Bu potensialnı üsterü, investitsiälärne cälep itü yağınnan başlanğan eşlärneñ qızulığı saqlana kilsä, bergäläp bez älege burıçnı ütärbez.”Ölkä buyınça Baş Federal' inspektor da alışındı. Georgiy İgnatoviç Omski ölkäsendä tuğan, awıl mäktäbendä uqıtqan, armiädä xezmät itkän, General' prokuror urınbasarınıñ yärdämçese bulıp eşlägän. Soñğı eş urını – Nijgarda Rusiä Federatsiäseneñ Xisap palatası wäkile. Ul üz eşen ölkäneñ byudjet yağınnan tä'min itelüennän başlamaqçı.
“Berençe çiratta – sotsial' ixtıäclar. Ä bu isä İñbaşınıñ üz wäkilläre aldında quyğan burlılarına täñgäl kilä. İnspektornıñ burıçı – çittän küzätep kenä toru ğına tügel, ä quyılğan burıçlarnı bergäläp tormışqa aşıru. Şunlıqtan bez cirle xakimiät wäkilläre belän berlektäş – soyuzniklar da” – dide Prezident wäkile.
Qunaqlar küñelle küreneşkä dä şahit buldılar: Ul'yanov rayonı üzäge İşeevkada tözätelgän xastaxanä näq alar qatnaşlığında açıldı.
Ayrat İbrahim, Sember
