Accessibility links

Tatar däwlät humanitar pedagogika universitetı studentları belem birü belän qänäğät


Tatar däwlät gumanitar- pedagogika universitetı bıyılnıñ 12 avgustında açılğan ide. Ağımdağı yılnıñ 6 sentäberendä deputatlar ike säğättän artıq 1994 yılnıñ 20 iyülendä Tatarstan Yuğarı Şurası qararı belän raslanğan Tatarstan Respublikası xalıqları tellären saqlaw, öyränü häm üsterü buyınça däwlät programmasında kürsätelgän Milli universitet belän yaña oyışqan universitetnıñ ber ük uqu yortımı – yuqmı ikänlegen tikşerde. Häm yuq digän fikergä kilde.

İnde xäzer tatar däwlät gumanitar pedagogik universitet studentlarınıñ berençe yartı yıllıq uquları da tämamlanıp kilä, alda yaña uqu yortındağı berençe imtixannar. Bezgä bilgele bulğança, nigezdä uqıtuçılar äzerläp çığaruçı bu universitetta, studentlar inde 3 aylıq stipendiälären ala almıylar. Räsmi bulmağan mäğlümatlarğa qarağanda alarnıñ kübese şäxsi fatirlarda tüläp tora. Bik azına ğına tulay toraqta urın tabılğan. Alarğa, sezgä tieşle tulay toraqlarda remont bara dip äytkännär. Stipendiä mäs’äläsenä kilgändä bez TDGPUdağı studentlar profkomınıñ buxgalterı Yılena Vladimirovna möräcäğät ittek. Ni öçen studentlarğa stipendiä birelmäde digän sorawğa ul bolay dip cawap birde:

“Anda çınnan da yaña quşılğan studentlarğa stipendiä birelmäde. Mäsälän tarix fakul'tetına stipendiä birelü turında yaña ğına prikazğa qul quyıldı. Şul nigezdä alarğa 9-10 dekaberdä barlıq stipendiäläre dä bireläçäk. Çönki KDPU ğa quşılırğa tieşle uqu yortlarında uquçı studentlarğa Rusiä byudjetınnan tügel, ä respublika byudjetınnan aqça bülep birelä. Tatarstan aqça bülep birmägäç stipendiä birelmi tordı. Xäzer inde bu mäs’älä xäl itelde diärgä bula. Studentlar da möräcäğät ittelär. Bu xaqta min işettem”.

Dimäk, studentlarğa stipendiä bireläçäk. Ä menä alarğa toru urınnarı buldırılırmı? Ällä inde alar tuğan-tumaçalarında, tanış-beleşlärendä, şäxsi fatirlarda qalırlarmı? Niçek kenä bulmasın küp kenä studentlar universitetta belem birü belän qanäğät häm uqu yortınıñ kiläçägenä ışana.

“- Min universitetnıñ kiläçägen zur dip sanıym, çönki kümäk xezmät yaxşıraq xezmät. Tamçıdan kül cıyıla dip äytälär bit.

- Bez çınnan da bu universitetnı tämamlağaç milli elita buluıbızğa ışanam, çönki bezne monda bik täcribäle häm üz eşlären başqara torğan uqıtuçılar uqıta. Häm alar bezne kiläçäkkä yaxşı uqıtuçılar bulırlıq itep äzerlilär. Milli elita digäç, ul bit inde şäxes bularaq ta formalaşqan bulırğa tieş. Häm bez toyabız üzebezdä yaxşı şäxes formalaşqanın.

- Bez ul universitetnı milli universitet statusında kötkän idek. Şulay uq Bolaq buyınnan menügä kompozitorıbız Salix Säydäşevnıñ häykäleneñ anda toruı küñelgä yatıp betmi. Berär böyek fiker iäsen Riza Fäxretdin, Qayum Nasıriylar urnaşsa bezgä ikençeräk bulır ide. Çönki bez bit konservatoriädä uqımıybız. Minemçä, zaman taläplärenä turı kilüçe uqıtuçılarnı barı tik tatar däwlät gumanitar pedagogika universitetında ğına äzerlänergä tieşlär.

- Min üzem bezneñ universitetnıñ yaqtı kiläçägenä ışanam, çönki menä bügenge köndä tatar mädäniäten, ädäbiäten, dönya mäydanına alıp çığu digän protsess barğanda, älbättä şuşı universitetnıñ barlıqqa kilüe häm anıñ kiläçäge bulu, tatar xalqı kiläçäge öçen bik äybät bulır ide.

- Bu universitetnıñ milli elitanı tärbiäläp çığaruına min ışanam. Milli elita – minemçä, ul tatar xalqın dönya külämendä tanıttıruçı keşelär”.

Gölnaz Şäyxetdin

XS
SM
MD
LG