Tömän ölkäseneñ invalidlar oyışmasına barlığı 18 meñ yarım keşe kerä. Bu xaqta Jurnalistlar yortında ütkän mäğlümat oçraşuı waqıtında bu oyışmanıñ räise Andrey Tolstov iğlan itte. Oçraşu 12 dekaber könne ütte. Bu oyışmağa kermägän tağın küpme invalid barlığın ber kem dä özderep kenä äytä almas. Annan da qala äle räsmiläşmägän ğäriplär häm zäğiflär küpme?
Tömän rayonınıñ Olı Aqyar awılına barıp ölkän yäştäge kemneñ genä işegen şaqıma äñgämädäşlär süzenä qolaq salsañ çäçläreñ ürä tora. Uramnıñ zirat yanına barıp törtelä torğan öydä Rauza apa yäşi. Rauza apanıñ 45 yıl sıyır sawğanğa ayaqları naçar yöri, küzläre kürmi. Anıñ östenä ber tübä astında alar ike onığı belän yäşilär. Xärbi xezmätkä barmağan onığı invalid. Ä ber onığı baliğ bulmağan qız bala. Uzğan yıl Rauza apanıñ küzenä operatsiä yasağan bulğannar. Şuşı qız bala äle dä anı citäkläp dip äyterlek yörtä.
Öylären cılıtu öçen alar elektr utına totaşqan radiator quyğannar. Ayına 700 sumlap ut öçen tüläp toralar. Rauza apanıñ öe bik tuzğan. Çınlap torıp qarasañ nigezennän uram kürenä. Miç östendä utırğan kästrüldä rizıqlarınıñ bäräñgedän yıraqqa kitmägänlege turında söyli... Rauza apalardan awılnıñ urtasına taba ber- ike yortnı uzıp Ğaniliän apa yäşi. Ğaniliän apanıñ öe ber qarağanda rätle genä kürenä. Xätta munça täräzäse dä plastiktan. Ämma ikençe yıl inde ul yapa-yalğız. Küñele dä kitek, ayaqları da yörmi. Berdän-ber ulı ülep kitkän. Bez Ğaniliän apa belän ul sudan qaytıp kilgändä oçraştıq.
Mine Olı Aqyar awılındağı räsmiläşmägän ğariplär belän Xatip ağa Xäbibullin tanışıtırıp yörde. Ul awılnıñ veterannar şurası başlığı. Xatip ağadan: “İnvalidlıq käğäzenä häm däwlätneñ östämä yärdämenä iä bulırday keşelär awılda küpme?”,- dip soradım. Ul: “Küp kenä”,- dide. Bu problemanı Xatip abıy süzlärençä, “Veteran” gazetası da kütärgän bulğan. Ämma däwlätneñ älegä sorawğa cawabı yuq. Ğaniliän apanıñ ayaqları sızlıy. İnvalidlıyknı räsmiläterü yulların belmi şul ul.
Tömändäge “Amänät” xäyriä fondı wäkilläre Tömän şähärendä ütkän Uraza bäyräme waqıtında: “Yärdämgä moxtaclar bulsa, bez qulıbızdan kilgän qädär bulışırbız”,- digän ide. Bu belderü “Yañarış” gazetasında da basılıp çıqtı. Xatip ağa Xäbibullin Olı Aqyarğa yulğa çığar aldınnan telefon aşa kemnärgä sädaqa itep azıq-tölek alıp kilergä ikänlegen äytte.
Yazmabız başında äytkän Tömän ölkäse invalidlar oyışması başlığı Andrey Tolstov jurnalistlar belän oçraşqan çaqta 2005 yılnıñ invalidlar öçen awır bulğanlığın belderde. İnvalidlar tormışına qağılğan 122 federal' qanunnıñ üzgärüe moña säbäp bulğan. Tormışta isä räsmiläşmägän ğärip bulıp yäşäp yatuçılar xälläreneñ niçek buluın üzläre genä belä torğandır...
Nail Alan, Tömän
