Accessibility links

Кайнар хәбәр

«Tatarstan poçtası» Rusiäneñ bötenlegenä yanıymı?


Xatlar yazam siña, xatlar yazam dip cırlana ber cırda. Xäzer, telefon häm internet zamanı bulsa da, käğäz xatlar cibärü ixtiacı betmi. Moña qädär, qaysı poçta aşa xatnı cibärü mäs’äläse tormıy ide. Ämma Tatarstan poçtası oyışması xosusıylaştırılğaç häm Rusiä Poçtasınıñ Tatarstanda bülege açılğaç, yazmaça sälämnäreñne kemgä tapşıru sorawı uylandıra başladı. Rusiä häm Tatarstan poçtaları arasındağı qarşılıq turında xäbär itkän idek inde. Ütkän ayda Tatarstan Poçtası añlatmalar birep, jurnalistlar belän oçraşqan ide. Rusiä poçtası isä, baş direktor isemennän, Tatarstan xalqına maxsus möräcäğät tarattı. Anda, Tatarstan xakimiätläre ayırımlanu, üzlärençä yäşäw, qanunsız eşläwdä ğäyıplänä.

«Rusiä poçtası»nıñ Tatarstandağı bülege respublika cirendä eşen başlap cibärde. Bu xaqtağı xäbärne mäğlümat agentlıqları tarattı. Oyışqan waqıtta materiallar, maşina belän, Tatarstannıñ Çuaşstan belän çiktäş şähärgä Qanaşqa qädär alıp barılıp, annan soñ, poçta vagonnarı belän ğädättäge yul belän Rusiä buylap taratılaçaq ikän. Şuşı xäbär belän bergä, Rusiä poçtasınıñ internet säxifäsendä, oyışmanıñ baş direktorı İgor Sırtovnıñ Tatarstan xalqına möräcäğäte basılıp çıqtı.

Anda bolay dip äytelä. «Rusiä poçtasın üsterer öçen zur adımnar yasar bu zamanda, Tatarstandağı qayber şäxeslär, Tatarstan poçtasınıñ möstäqil yuldan baruın teli. «Tatarstan poçtası» Rusiä poçtası, Unitar däwlät oyışmasına kermäde häm Tatarstan xökümäte qararı belän xosusıylaştırıldı.» - dielä älege xatta. Şulay uq, baş direktor, Tatarstan poçtasınıñ poçta xezmätlären kürsätergä maxsus röxsät kägäze, litsenziäse yuq, dip belderä. İgor Sirkov, «Tatarstan poçtası» xat, banderol’lär respublika eçendä häm annan çittä barıp citär dip garantiä birä almıy, dip yaza älege xatında.

Bu mäs’älädä añlatmalar sorap, «Tatarstan poçtası» oyışmasına möräcäğät ittek. Bezneñ sorawlarğa oyışmanıñ xoquq bülege başlığı Yuldaş Musin cawap birde. «Tatarstan poçtası» bezneñ eşläw röxsäte bar häm Rusiä poçtası beldergän däğwälar nigezsez, dide ul. Xäzerge waqıtta, Tatarstan poçtasınıñ barlıq bülekçäläre eşli Xoquq belgeçe Yuldaş Musinnıñ äytüenä qarağanda, 122 federal qanun belän bergä elemtä turındağı qanunğa da tözätmälär kergän bulğan. Anıñ nigezendä, cirle poçta oyışmaları yä federal qaramaqqa birelälergä tieş, yä xosusıy oyışmağa äwerelergä tieş. Federal qaraqqa küçerelü waqıtı 2004 yılnıñ 31nçe dekaberenä qädär mömkin bulğan. Aña qädär, Rusiä Potçası da, bu yünäleştä ber nindi adımnar yasamadı, «Tatarstan poçtası» da anda kermäde .Xosusıylaştıru ütkärmiçä, başqa çarabız yuq ide, dide bezgä xoquq belgeçe Yuldaş Musin. Rusiä poçtası oyışması wäkilläre, barınnan da bigräk, buşlay, üzlärenä Tatarstan poçtasınıñ milegen tapşırunı taläp itä. Respublika elemtäçeläre, bu Tatarstannıñ üzeneñ milege, dip äytep kilä. Nizag däwam itä. Belgängezçä, Rusiä Poçtası Tatarstanda üz bülekçäsen açırğa buldı. «Tatarstanda bezgä här yaqlap kirtä qoralar», dip belderä İgor Sırtsov üzeneñ xatında. «Binanı arendalağanda, telefon kertkändä qıyınlıqlar tuıp tordı, salım xezmäte «Rusiä poçtası» bülekçäsen başta terkäde, annan soñ, qararın tuqtattı». İkençe yaqtan, «Rusiä poçtası», «Tatarstan poçtası» cihazları aşa tamğalanğan xatlar, qanuni tügel dip, federal poçta aşa taralmayaçaq, dip yanıy. Ämma, xäbärlärgä qarağanda, Tatarstan poçtası tamğalaw maşinaları urınına, maxsus marka yabıştırılğan oçraqta, problema xäl itelä. Bu wäzğittä, närsä eşlärgä qala? Tatarstan poçtası xoquqçısı Yuldaş Musin elekkeçä, Tatarstan häm Rusiä poçtaları arasında kileşü tözep, eşne däwam itärgä täqdim itä. Rusiä potçası da, şul yulnı saylağan. Kileşülär tözegän. Ämma baş direktornıñ xatında, bez monı eşlärgä mäcbür buldıq, dip bilgeläp ütelä. Anda şulay uq, Tatarstanda qabul itelgän qararlar, Rusiä poçta bötenlegen cimerä, digän gäyepläw dä äytelä. Xäzerge waqıtta, ike yaq arasındağı nizag mäxkämädä qarala. Şul xaqtağı utırış bu könnärdä bulırğa tieş ide, ämma 26 ğinwarğa küçerelgän. Ä aña qädär, ike poçta da, kileşelgänçä, eşlären däwam itäçäk.

Bikä Timerova.

XS
SM
MD
LG