Ukraina tışqı eşlär ministrı Boris Tarasük, gaz mäsäläsendä Rusiä belän kilep çıqqan kierenkelekkä xisle añlatmalarnı çiklärgä çaqırdı. Şulay uq, Rusiä xärbi diñgez köçläre flotınıñ Aqyarda toruı öçen kübräk aqça taläp itü – mäsälägä çişeleş bula almıy, dide Tarasük. Sişämbe könne, Ukraina prezidentı Viktor Yuçenko, ägär dä Rusiä gaz bäyäsen 4 tapqırğa arttırsa, Ukraina Aqyardağı baza öçen kübräk aqça sorayaçaq, dip beldergän ide. Ul arada Ukrainanıñ Rusiädäge wäkile Leonid Osavolük, Rusiäneñ Qara diñgez flotın Qırımda qorılmalarnı qanunsız üzläşterüdä ğäyepläde. "Qayber xärbi qorılmalar qanunsız räweştä Rusiäneñ Qara diñgez flotı qulında, häm Ukraina alarnı kire qaytarırğa teli", dide Osavolük. tsitat tämam. Tögäl nindi qorılmalar turında süz barğanı bilgesez qaldı.
