Accessibility links

Кайнар хәбәр

Säddamnıñ advokatı azaplawlar turında ğäyepläwlärne qabatlıy, AQŞ monı yalğan dip atıy


Säddam Xösäinneñ baş advokatı Xälil äd-Dulaymi Säddam AQŞ törmäsendä azaplawlarğa duçar bulğan digän ğäyepläwlärne tağın ber märtäbä qabatladı. Jurnalistlar öçen ul bu belderüne İordaniä başqalası Ammanda üzeneñ eş bülmäsendä yasadı. Äd-Duläymi Säddam Xösäin äytkännärne äytä. Amerikan törmä xezmätkärläre Xösäinne azaplağan di häm bu turında mäxkamägä şikayät itüen belderä. Şimbä könne ul Xösäinne bäysez meditsina komissiäse tikşerergä tieş dide.

"Bez mäxkamädän, aldağı ike köndä yazma räweştä möräcäğät tapşırıp, prezident Säddam Xösäinne bäysez meditsina komissiäsenä kürsätüne sorıybız. Anda advokatlar yäki anıñ doşmannarı bulırğa tieş tügel. Prezidentnıñ tänendä azaplaw ezläre bar häm anı qulğa alğanda da millionnarça ğiraqlı häm ğäräplär anıñ bitendä azaplaw ezläre kürde" dide äd-Dulaymi.

Ämma AQŞ däwlät departamentı bu ğäyepläwlärne yalğan dip atıy häm Xösäin diktaturası qorbannarına iğtibar citmi di. Däwlät departamentı süzçese Sean McCormack "Ğiraqnıñ tikşerüçe xakime bu ğäyepläwlärneñ yalğan buluın belderde" dide.

Pänçeşämbe könne Xösäin şulay uq tänendäge azaplaw ezlären kürsätä aluın beldergän ide. "Min yazğannarımnı sezneñ alda qabatlıy alam. 3 meditsina törkemenä, yäki kimendä 2 meditsina törkemenä kürsätkän yaralar çın. Häm 8 aydan bu yaralarnıñ qayberläre yaxşırdı, qalğannarı 3 könnän soñ da äle kürenä. Bez yalğan söylämibez, Aqş Yort yalğan söyli" dide Säddam.

AQŞ däwlät departamentı süzçese 20-nçe ğasırnıñ iñ kürenekle küpläp üterüçelärennän berseneñ azaplawlarğa duçar buluı turında belderüe ironiä dide. McCormack kiñküläm mäğlümät çaraları Säddamnıñ ğäyepläwlärenä iğtibar birgändä, anıñ qorbannarı söylägän awır waqıyğalar iğtibardan çittä qala di.

"Çınbarlıq, häm başqalarğa işetterelergä tieşle tawışlar Säddam Xösäin qorbannarınıqı. Säddam Xösäin ğasırnıñ iñ küp keşe üterüeçlärennän berse buldı. Häm xäzer anıñ rejimınıñ zolımın, ezärleklären, räximsezlegen häm köç qullanuın täfissläp sürätlärlär öçen mömkinlek açıldı. Bu mäxkamädä şul mäs''älä qarala" dide McCormack.

Mäxkamädä Säddam belän bergä anıñ 7 yaqını da xökem itelä. Alar Säddamğa höcümnän soñ 1982-nçe yılda şığıy Ducail awılında 148 keşene üterüdä ğäyeplänä. Ägär ğäyepläre raslansa alarğa ülem cäzası yanıy. Säddamğa Ğiraqnı citäklägändä qılğan ğämälläre öçen başqa ğäyepläwlär dä belderelergä mömkin. Mäxkamäneñ uzğan atnakiçtäge utırışı kiçekterelde häm kiläse utırış 24-nçe ğinwarda bulır dip kötelä. Naif Aqmal, Praga.
XS
SM
MD
LG