«Bars-media» şirkäte tarafınnan ütkärelä torğan «Tatar cırı -2005 » festivale, aldağı yıllarda iñ qıybat bilet bäyäläre, iñ şaw-şulı reklama häm qatnaşqan artistlarnıñ küplege, estrada yoldızlarnıñ zurlığı belän istä qaldı. Bıyılğı altınçı «Tatar cırı» festivale, tıynağraq buldı, konsertlar da ike genä kön ütkärelde. Ämma, barıber ciñüçelär bilgelände, 2005 yılda iñ populär bulğan cırçılarğa altın bars sınnarı tapşırıldı. Tatar konsertları arasında iñ däräcäçäsenä äwerelgän «Tatar cırı-2005» festivale çaraları, bıyıl da, tamaşaçılarnıñ iğtibarın cälep itte. Bilet bäyäläre 300dän başlap 1meñ sumnan da qıybatraq bulsa da, zaldağı urınnar ber ay aldan satılıp betkän ikän. 23-24 dekaberdä ütkän festival könnärendä, yaña ğına säxnägä çıqqan yäş başqaruçılar belän bergä, Altın bars sınnarı belän büläklänüçe ölkänräk artistlar qatnaştı. Festival’neñ berençe könendä «Tatar radiosı» ütkärgän «Yoldızlar fabrikası» proyektında qatnaşuçı yäşlär häm inde tanılğan artistlar, duet bulıp cırladı. Yäşlärgä urın birgännän soñ, ölkännär dä, tamaşaçılarnı yaña cır belän tanıştırdı. Mäsälän Zöfär Bilalov, Almaniä kügendä haläq bulğan Başqortstan balalarına atap yazılğan Robert Timerbayıvnıñ «Bala qayğısı» cırın başqardı.
Bu cır, qayğılı xäsrätle temalarnı kütärgän berdänber cır buldı. Alıp baruçılar öçen yazılğan tekstlarda kübesençä, uyın kölke häm reklamağa urın birelde. Festival’neñ berençe könendä, Mubai isemle başqaruçı, «Qorban» törkeme kebek cır sänğäteneñ başqa manerasında cırlawçılar da qatnaştı. Ä, 24 nçe dekaber kiçendä, Piramida üzägendäge gala-konsertta altın bars sınnarı tapşırıldı. Bıyıl alarnıñ sanı 20gä citte. Xit-paradlar häm xatlardan saylap alınğan iñ populär cırçılar häm duetlar festival lawreatarı buldı. Mäsälän, alar arasında «Saw bul» cırı belän «Ayfara» törkeme, «Qarlığaçlar» cırı öçen yäş cırçı Asılyar, «Mizgel» cırı belän Bulat Cihanşin, «Mäxäbbät cimeşläre» cırın başqarğan Rezidä Qadırova, Ayğöl Sağınbaeva «Sin kilmädeñ» cırı öçen büläklände. Şulay uq, Altın bars iäläre arasında Färit Taişev, Dilä Niğmatullina, Läysän Ğimaeva, İlnar Säyfiev, Älfina Äğzämova, Näfqät Niğatllin, Mälikä, Dilä Nigmatullina, Zöfär Bilalov häm Zäynäp Färxetdinova, Aydar Ğalimov, Salavat häm Xäniä Färxi bar. Xäniä Färxi häm Salavat öçen Altın bars sını yañalıq bulmasa, Landış Niğmätcanovanıñ häm Salawat Miñnexanovnıñ ale berençe andıy zur büläk aluları ide. Salavat Miñnexanov häm Dilä Nigmätullina belän bergä başqarğan «Añlaşırğa ide» cırı da festival lawreatı buldı.
«Bars-Media» şirkäte ütkärgän älege festival, ğädättägeçä, «tatar cırı» gimnın kümäkläşep başqaru belän tämamlandı.
Bikä Timerova.
