Accessibility links

Кайнар хәбәр

Beslan faciğäse öçen cirle räsmilär ğäyeple, di parlament komissiäse


Çärşämbedä Beslan faciğäsen tikşerüçe parlament komissiäse başlığı Aleksandr Troşin, faciğädän soñ 16 ay ütügä, komissiä eşeneñ berençel näticäläre belän tanıştırdı. Parlamentnıñ ike palatası aldında yasağan çığışında Torşin, ul qan qoyunı buldırmıy qalıp bulğan bulır ide dide, häm cirle räsmilärne buldıqsızlıqta ğäyepläde.

Komissiä şundıy näticägä kilgän: Beslan mäktäbendäge faciğäne buldırmıy qalıp bulğan bulır ide. Ägär Tönayq Osetiä militsiäse Mäskäwdän kilgän kürsätmäne ütägän bulsa. Torşin süzlärençä, 1 Sintäbergä 2 atna qala Rusiäneñ eçke eşlär ministrı Räşit Nurğaliev häm anıñ urınbasarı uqu yılı başlanır aldınnan iminlek çaraların köçäytergä sorap telegramma yullağan. Läkin Beslannıñ 1nçe sanlı mäktäbe yanına ni barı ber militsiä xezmätkäre quyılğan, ul üze dä totıq itep alınğan.

3 kön däwam itkän totıq alu faciğäse waqıtında bixisap xatalar cibärgän öçen dä Torşin cirle citäkçelärne ğäyepläde. "Totıqlarnıñ yaqınça sanı 1 Sintäber töştän soñ uq bilgele buldı. Ul arada räsmilär täwlek buyına 354 totıq turında söyläp tordı. Xoquq saqlaw buınnarı arasında koordinatsiä zäğif ide. Mäktäp tiräsenä quıylğan saqçılar balaların qotqarırğa aşqınğan ata-analarnı tuqtata almadı. Bu isemlekne däwam itergä bula," di Aleksandr Torşin.

Torşin süzlärençä, terror höcümnären kisätü çaraları da, militsiä citäkçeläreneñ äzerlege dä tieşle bulmağan.

Totıq alu faciğäse 3 Sintäberdä Rusiä xärbiläre belän Çeçnädän Rusiä ğäskärlären çığarırğa taläp itkän totıq aluçılar arasında atışular belän tämamlandı. Näticädä 330dan artıq keşe häläk buldı, kübese balalar.

Räsmi añlatmağa kürä, mäktäp eçendä bulğan şartlawdan soñ Rusiä xärbiläre totıqlarnı azat itü operatsiäsen başlağan. Qorbannarnıñ kübese şul yanğında häläk bulğan.

Ämmä qorbannarnıñ tuğannarı räsmilärne qotqaru operatsiäsen döres başqarmawda, xataların yäşerü niätendä ğäyepli.

Anetta Gadieva, totıqlarnıñ berse, Beslan mäktäbendä qızın yuğaltqan. Torşin çığışın televizor aşa qarağan häm älegä qänäğät qalğan. "Torşinnıñ qotqaru ştabın tänqitläwe yaxşı. Älbättä, tulı xisapnı küräse kilä, şunnan soñ bäyä birep bulır ide. Älegä äytelgännär belän bez qänäğät," di Anetta Gadieva.

Torşin komissiäse näticäläre ber kön elek prokuratura bäyän itkän xisapqa qapma qarşı kilä. Sişämbedä baş prokuror urınbasarı Nikolay Şepel, belgeçlär törkeme Beslan faciğäse waqıtında räsmilärneñ xataların tapmadı dip beldergän ide. Bu belderü qorbannarnıñ tuğannarında açu xisläre uyattı. Alar maxsus köçlärne höcüm waqıtında ut atuçı qoral, tanklar qullanuda ğäyepläp kilde. Räsmilär üzläre monı kire qağa. Äytkändäy, bu awır qoral qullanu mäsäläsendä, Torşin komissiäse dä räsmi añlatmanı qabatladı.

Şul uq waqıtta, Torşin süzlärençä, küp sorawlar älegä cawapsız qala. Bu sorawalarğa açıqlıq kerter öçen ul prokuraturadan östämä dokumentlar soradı.

Baş prokuraturağa tikşerü ütkärergä Rusiä prezidetı Vladimir Putin quşqan ide. Ä menä parlament komissiäsenä ul başta qarşı çıqqan ide. Beslan faciğäsen tikşergän öçençe törkem – Tönyaq Osetiä parlamentınıqı. Bu törkem qotqaru operatsiäsendä citdi xatalar bulğan digän näticä yasadı häm monıñ öçen ğäyeple räsmilärne cawapqa tartırğa çaqırdı.

-Ali Gilmi
XS
SM
MD
LG