Bushnıñ Yaqın könçığış säfäre, Amerikada uzğan Annapolis söyläşülärenä 6 atna tuluğa turı kilä. Annopolistä, citäkçelär söyläşülärne däwam itterü turında kileşkännär ide.
Uzğan atna, Bushnıñ däwlät iminlege kiñäşçese Stefen Hedley, AQŞ prezidentınıñ tınıçlıq söyläşülärenä turıdan turı qatnaşmayaçağın beldergän ide. Belgeçlär, Bush ğaräp citäkçeläre belän oçraşuda alarnı tınıçlıq planın yaqlarğa öndäw belän genä çiklänäçäk dip isäpli.
Şulay da Bushnıñ Fälästin häm İzrail cirlärenä bulğan berençe säfäre simvolik mäğnägä dä iä.
Waşiñtondağı milli saqlanu universitetında, Yaqın könçğış belgeçe Möşärräf Cawcati bu säfärneñ ähämmiäte turında bolay fiker bäyan itte:
“Bu säfär soñlap bulsa da barıber kiräkle. Xäzergä xatle bu töbäk öçen ber ni eşlänmäde, häm ber nindi näticädä bulmadı. Bush xaqimiätkä kilgännän soñ 7 yıl uzğaç qına bu töbäkne iskä töşerde. Läkin anıñ idaräseneñ waqıtı betüenä ber niçä ay qalğanda anıñ bu tırışlığı ällä ni fayda kürsätmäs. Şulay da anıñ bu tırışlığı Yaqın könçığışnıñ tağın da qurqınıç xälgä äwerelüen bastıra alır.”
Säfär barışında Yaqın könçığıştan qala, Ğiraqqa da tuqtalu ähämmiätle. Bush Quwäyttä xärbi häm säyäsi yuğarı räsmilär belän oçraşaçaq. Bush general Petreaus häm AQŞ ilçese Ryan Crocker belän dä şunda oçraşaçaq.
Uzğan yıl, AQŞnıñ xärbi bularaq Ğiraqta qaluı, mäzxäbara nizaqlarnı kimetüdä unışlı buldı dip isäplänä. Bu waqıt Ğiraq xaqimiätenä konstitusiäne köylärgä häm ildäge qarşı taraflarnı berläşterü öçen ber forsat bulğandır dip farazlana. Şulay da bu eşlär bik äkren bardı.
Säfär barışında İran mäsäläse dä zur ähämmiätkä iä. Bush İrannıñ atom tırışlığına qarşı citdilegen däwam itterü belän bergä AQŞqa yaqın bulğan sönni illär belän dä aranı yaxşı totarğa tiyeş bulaçaq. Bu fiker, Waşiñtonda säyäsi tikşerenü üzäge belgeçe Micheal O’Hanlonnıñ ide.
“Min AQŞ idaräse bu säfäre waqıtında İranğa qarata yaxşı möğamälädä bulır dip uylamim. Minem uylawımça, İrannıñ atom programı, anıñ yaqın könçığışta terorçılıqnı yaqlawı häm İrannıñ Ğiraq eçendäge role haman zur mäsälä. Şunın öçen wazğiät yaxşıdan kübräk naçar kürenä. Läkin bu wazğiätne tigezläw maqsatında, soñgı arada bulğan ağımnar naçar yaqlarnı ciñeläytergä küpmeder bulsa öleş kertte kebek.”
İran tışqı eşlär ministrı isä, Bushnıñ säfären propaganda dip atadı. İran yağı anı töbäktäge däwlätlär arasındağı mönäsäbätlärgä tıqşınu bularaq bäyäli.
O’Hanlon “ber närsä açıq, Bush, İrannıñ töbäktä xaqimlek itü tırışlıqlarına qarşı säyäsätenä üzenä dus ğaräp illärendä cälep itmäkçe di. Ä monı astırtın ğına eşlärme yäisä açıqtan açıq mı? inde anısın waqıt üze kürsäter” di.