Accessibility links

Кайнар хәбәр

İran: Eçkeçegä ülem cäzası yanıy


Iranda araqı eçü, keşe tormışın qurqınıç astına sala. Sälämätläkkä genä tügel ä qanun buyınça. İran qanunnarında, kisätülärdän soñ haman eçüen taşlamağan keşegä, 3. kisätüdän soñ ülem cäzası birelä. Araqı eçü säbäble ilneñ bu qanunıñ 4 tapqır bozğan 22 yäşendä ber yeget küptän tügel qulğa alındı.


Tähranda mäxkämäseneñ, Möhsin isemle ber yäşne “qatu eçüçe häm inde tözätep bulmas” digän qararı belän ülem cäzasına xöküm itüe xäbär itelä. İran matbuğatı yazuınça älege yäşneñ ülem xökemen 2. ber Tähran mäxkämäse qarap çığa. Yuğarı mäxkämägä möracäğat itüe öçen aña 20 kön birelgän.

İran qanun sistemında dini tärtip buyınça, ägär kemder kisätülärgä qaramastan 4. tapqır araqı eçüe kürelä ikän aña ülem cäzası yanıy. Bu qanunnı berençe tapqır bozğan keşegä başta aqçalata cäza birelä. Eçüen däwam itsä här säfärenä 80 qamçı yäisä törmä cäzası birelä.

Möhsin monnañ elek, alkohol eçemlek eçkän öçen 3 tapqır, 2006 yılnıñ may, yün häm üktäbr aylarında cäzalanğan ide. Anıñ advokatı Aziz Nokendei, xäbärçelärgä “eçep tärtipsezlek buldırğanı öçen” qulğa alınuın belderde.

1979 yılda dini inqilap bulğannañ soñ, İranda alkohol eçü tıyılğan ide.

Tähran cinäyät mäxkämäse xakime Cälil Cälili mäxkämäneñ Möhsingä ciñel mönäsbättä toruın belderde. Çönki dini tärtepkä kürä, kemder 2 tapqır tärtepne bozsa, här oçrağında cäza birelä häm öçençe dä inde ülemgä xöküm itelergä tiyeş di ul.

Läkin İranda dini tärteplär buyınça eçkeçelek cäzalansa da, qaysı ber İranlı advokatlar bu tärtipne bozğannarnıñ ülemgä xökem itelüe, İran qanunlarına turı kilme di.

İran advakotları bäysez cämğiät idaräse äğzäse, Möxämmäd Ali Dadxah İrannıñ Xalıqara Keşe xoquqlarına qul quyuı säbäple anıñ eçkeçelekkä qarşı cäza berü tärtebe xalıqara tärteplärgä qarşı kilä di.

İranda eçkeçelekkä qarşı qırış cäzalar buluına qaramastan, İranlılarnıñ küpçelege bu qanunnı sanğa suqmıy. İl xaqimiäte soñgı yıllarda alkohol satunıñ artuın inqar itmi. İranda yılına ber million litr alkohol satıla. Alkoholne ilneñ böten cirlärendä qara bazarlardan tabıp bula.

İldäge möselman bulmağan, xristian ärmäni azçılıqlarğa isä alkohol citeşterü häm qullanu röxsät itelä. Läkin dinne totqan keşelärne räncetmäs öçen yäşeren eçü şartu belän.

İran, ülemgä xöküm itüçe illär arasında berençe rättä bulğanı öçen xalıqara tänqitkä duçar qala. İranda köçläw, zina, narkotik satu - ülem xökemenä tartıla.

Şulay da eçkeçelek yözennäñ ülemgä xöküm itü bik siräk oçrıy torğan xäl ide.


XS
SM
MD
LG