Accessibility links

Кайнар хәбәр

Коронавирус. Җанлы блог

Коронавирус турында актуаль хәбәрләр тупланмасы [14 март — 25 май 2020]


йомгак

Азатлык әлеге Җанлы блогта дөньяда яңа вирус тарала башлаган иң кызу көннәрдә сезне шушы зәхмәткә бәйле соңгы хәбәрләр, гыйбрәтле хәлләр, кызыклы вакыйгалар белән таныштырып барды. Бүген без Җанлы блогны ябабыз. Алга таба коронавируска бәйле хәбәрләрне Коронавирус бүлегендә һәм Махсус сәхифәдә таба аласыз. Игътибарыгыз өчен рәхмәт!

21:42 20.5.2020

Әлмәт кешесе җәмәгать урынында битлек кимәгән өчен кулга алынган

Әлмәт шәһәре мәхкәмсе җәмәгать урынында битлек кимәгән өчен 30 яшьлек ир-атны кулга алган. Мәхкәмә карары белән аңа өч тәүлек сак астында тоту җәзасы бирелгән. Бу турыда Эчке эшләр министрлыгының Татарстан идарәсе хәбәр итә.

Хәбәрдә әйтелгәнчә, бу кешене рейд вакытында полиция хезмәткәрләре туктаткан һәм патруль машинасына баруын таләп иткән. Ләкин тоткарланучы моны эшләүдән баш тарткан һәм “каршылык күрсәткән” диелә.

21:39 20.5.2020

Тәлгать Таҗетдин мөселманнарны Ураза гаетендә мәчетләргә җыелмаска чакырды

Тәлгать Таҗетдин
Тәлгать Таҗетдин

Русия мөселманнарының үзәк диния нәзарәте рәисе Тәлгать Таҗетдин мөселманнардан Ураза гаетенә мәчетләргә җыелмауларын сорады.

“Рамазан тәмамлана. Ул гади шартларда түгел, ә пандемия шартларында тәмамлана. Рамазан ае үзе дә карантин шартларында узды. Илебезнең президенты һәм төбәкләр җитәкчеләре бу пандемия белән көрәшкә зур игътибар бирә, шуңа күрә без дә бу көрәштә катнашырга тиеш” диде Таҗетдин.

Мөфти сүзләренчә, гает көнне мәчетләргә санаулы кешеләр генә киләчәк, бу имамнар һәм мәчет хезмәткәрләре булачак. Калган мөселманнар өчен Мәскәү вакыты белән иртәнге сәгать җидедән БСТ каналында, аннары Русиянең Беренче каналында Ураза гаетеннән трансляция булачак.

14:53 20.5.2020

Татарстанда Ураза гаете онлайн узачак

Камил Сәмигуллин
Камил Сәмигуллин

24 майда Ураза гаете бәйрәме Live форматында узачак. Бүген Татарстан мөфтие Камил Сәмигуллин мөселманнарга шундый мөрәҗәть белән чыкты. Белдерү тексты мөфтият сәхифәсендә эленгән. Әлеге мөрәҗәгать мөхтәсибләргә аерым җиткерелгән.

"Татарстан диния нәзарәте Рамазан ае тәмамлану уңаеннан Ураза гаетен Live форматында үткәрү турында карар кабул итте – һәр мөэмин-мөселман бәйрәм вәгазен "ТНВ" телеканалы, Татарстан мөселманнары Диния нәзарәтенең рәсми сайты һәм "Хозур ТВ"ның YouTube-каналы аша турыдан-туры трансляцияне карый алачак һәм шул рәвешчә бәйрәм мохитен тоя алачак", диелә Камил Сәмигуллин мөрәҗәгатендә.

Татарстан мөфтие халыкны мәчетләргә бармаска һәм сабыр итәргә чакыра.

14:21 20.5.2020

20 майда онлайн тамашалар

Азатлык пандемия чорында өйдә утыручыларны бүген татар һәм башкорт телләрендә булачак кызыклы онлайн чаралар, тамашалар белән таныштыра.
Уфаның Мостай Кәрим исемендәге миллия яшьләр театры "Исәнме, әни!" спектаклен (17:00) күрсәтә.

Бүген Мәскәүдәге "Татар штабы" оешмасы үзенең Instagram-да "Чәкчәк" Пермь татар яшьләре оешмасы рәисе Рөстәм Галимов белән туры эфирда очрашу (18:30) уздыра.

Башкортостанның Бүздәк районында урнашкан татар этнография музее буенча экскурсия карап була.

Галиәсгар Камал исемендәге татар драма театры үз сәхифәсендә Салават Юзиевның "Үт күршеләр" спектаклен тәкъдим итә.

14:09 20.5.2020

Дөнья банкы: коронавирус сәбәпле 60 млн кеше фәкыйрьлеккә төшәргә мөмкин

Коронавирус пандемиясе китереп чыгарган икътисади кризис аркасында бөтен дөнья күләмендә 60 мле кеше “соң чиктәге фәкыйрьлек” хәленә төшәргә мөмкин. Бу турыда Дөнья банкы җитәкчесе Дэвид Малпас белдергән, аның белдерүе оешманың сайтында дөнья күргән.

“Безнең бәяләү нигезендә, 60 миллионга кадәр кеше соң чиктәге фәкыйрьлек шартларында яшәргә мәҗбүр булачак, бу безнең соңгы өч елда фәкыйрьлеккә каршы көрәштә ирешкән алга китешне юкка чыгара”, дигән Мэлпас.

Дөнья банкы билгеләмәсенә ярашлы, көнлек кереме 1,9 доллар һәм аннан кимрәк булган кешеләр “соң чиктәге фәкыйрьлек” хәлендә яши дип санала.

Моннан тыш, оешма 2020 елда дөнья икътисады минус 5 процентка кадәр рецессия кичерер дип фаразлый.

13:58 20.5.2020

Татарстан коронавирус үлемнәре иң аз булган төбәкләр арасында аталды

Татьяна Голикова
Татьяна Голикова

Татарстан Тамбов һәм Свердловски өлкәләре белән бергә COVID-19 китереп чыгарган үлемнәр иң азы булган төбәкләр өчлегендә. Бу хакта Федерация Шурасында чыгышында Русия вице-премьеры Татьяна Голикова хәбәр иткән.

“Бүгенге көндә COVID-инфекциясеннән үлемнәр күрсәткече Русиядә 0,95 процент тәшкил итә, бу тулаем дөнья күрсәткеченнән сизелерлек кимрәк. Иң түбән күрсәткеч диясем килә” дигән Голикова.

Русия төбәкләре арасында коронавирус белән авыручылар һәм аннан үлүчеләр нисбәте ягыннан Тамбов, Средловски өлкәләре һәм Татарстанның күрсәткечләре түбән булуы әйтелде.

Тамбов өлкәсендә 20 майга бу күрсәткеч 0,23 процент (2154 йогышлану очрагына 5 үлем туры килә), Свердовски өлкәсендә - 0,25 процент (3134 очракка 8 үлем) һәм Татарстанда - 0,32 процент (2475 очракка 8 үлем).

11:25 20.5.2020

Русиядә коронавирус йоктыручылар саны 300 меңнән артты

Татарстанда узган тәүлектә тагын 75 кешедә коронавирус рәсмән расланган. Бу санны Русия коронавируска каршы көрәш оператив штабы китерә.

Республикада барлыгы 2475 кешегә коронавирус йоккан, 1452 кеше савыккан. Яңа үлем очраклары турында хәбәр ителми. Алдагы көннәрдә республикада коронавирустан сигез кеше үлгән иде.

Башкортстанда узган тәүлектә 88 кешедә COVID-19 расланган. Республикада яңа вирус барлыгы 2335 кешедә рәсмән теркәлгән, 714 кеше савыккан. Соңгы тәүлектә тагын бер кешенең үлеме турында әйтелә. Эпидемия башыннан бирле республикада 18 кеше коронавирустан үлгән.

Русиядә COVID-19 йоктыручылар саны 8764 кешегә арткан, 135 кеше үлгән. Барлыгы 308 705 кеше коронавирус йоктырган, 2972 кеше үлгән, 85 392 кеше савыккан.

08:51 20.5.2020

20 майга төп иртәнге хәбәрләр:

  • Дөньяда коронавирус йоктыручылар саны 4 миллион 900 меңнән арткан. 323 мең кеше үлгән, 1 миллион 689 мең кеше сәламәтләнгән.
  • АКШта авыручылар саны 1 миллион 528 меңгә җиткән, Русиядә – 299 меңнән, Бразилиядә – 271 меңнән, Британиядә – 250 меңнән, Испаниядә 232 меңнән арткан.
  • Русиядә туризм изоляциядән 1 июньдә чыга башлаячак. Беренче чиратта медицина лицензияләре булган шифаханәләр, коттеджлар һәм апарт-кунакханәләр эшли башлаячак. Моның турында Ростуризм башлыгы Зарина Догузова белдерде.
  • Коронавирус пандемиясе аркасында дөнья икътисады төшүе 60 миллион кешене фәкыйрьлеккә китерә ала. Фәкыйрьлек дип көнлек хезмәт хакы 1,9 доллардан түбәнрәк булучылар атала. Моның хакта Дөнья банкы җитәкчесе Дэвид Малпасс әйтте.
  • Кыпрыс 15 июньнән янә туристларны кабул итәргә әзерләнә. Илнең туризм министрлыгы туризмнан керемнәр узган елгы күрсәткечләрнең 30%-ы булуын көтә.
  • Латвиянең AirBaltic һава ширкәте Ригадан Һелсинкига, Мүнһен һәм Берлинга очышларын торгыза. Ширкәт транспорт министрлыгының махсус рөхсәтен алган. Март аенда AirBaltic коронавирус сәбәпле очышларын туктаткан дөньяда беренче һава ширкәте булган.

дәвам

фикерләр (37)

бу форум ябык

Коронавирус нәрсә ул?

Коронавирус дип генетик яктан бер-берсенә якын булган вируслар төркеме атала. Алар аерым хайваннарга һәм кешегә йога ала. Кайчак андый йогу ачык билгесез уза, кайчак салкын тию рәвешендә сизелә. Авыр очракларда инфекция пневмониягә китерә ала, ул исә кешенең үлеме белән тәмамланырга мөмкин. Чирнең авырлыгы вирусның төреннән һәм штаммыннан, организмның үзенчәлекләреннән тора.

Төп симптомнар:

  • югары температура
  • коры ютәл
  • хәлсезлек
  • тән сызлау

Саклану чаралары:

  • гигиена (кул юу, авыз-борынга тимәү)
  • башкалардан ара тоту ( кимендә 2 м)
  • кеше күп җыелган урыннарга бармау
  • витаминга бай җиләк-җимеш, яшелчә ашау
XS
SM
MD
LG