Yullarnıñ naçar buluı iqtisadqa üsärgä irek birmi
Rusiädä 30% yullarda tieşennän kübräk maşína yöri. Şähär ara yörü waqıtı 2lätä arta. Hawa transportınıñ xäle bik naçar, xätta absurd xälgä citä. Bügen hawa yulları belän qullanunıñ 67% Mäskäwgä turı kilä. Ğäcäyep xäl, bügen Irınburdan Qazanğa oçar öçen Mäskäw aşa barırğa kiräk. Mäsälän Amerika quşma ştatlarında hawa yulları belän qullanuçılar sanı Rusiägä qarağanda 10 märtäbä artıq, Yewropağa qarağanda 7 märtäbä, anıñ qarawı bezdä hawadağı 1 çaqrım yul oçu çığımı, alarğa qarağanda bermä-ber qıybatıraq. Tatarstanğa qağılğan yullarnı tözekländerügä kilgändä. Bez M7 federal' yulın öleşlärgä bülep tözekländerergä qarşı, anı tulısınça tözekländerü buyınça bezneñ taraftan inde federal' programma qarala.
----------------------------------------------------------------------------------------------
Tatarstanda hawa alannarınıñ sıyfatı naçar xäldä
Qazan hawa alanınıñ nıq naçar xäldä buluı bügenge köndä matbuğatta küp söylänä. Biregä investorlarnı cälep itü maqsatınnan, respublika citäkçelege xäzer inde Tatarstan hawa şirkäten kire xökümät qaramağına qaytardı. Şuña da yaqın kiläçäktä hawa alanı tözekländereläçäk dip belderä belgeçlär.
Tatarstanda hawa alannarınıñ sıyfatı naçar xäldä. Monı inde bezgä härdaim hawa yulları belän qullanuçılar da, eşmäkärlär dä, investorlar da äytep kilä. Bıyıl bez Qazan hawa alanın tözäkländerä başlıybız. Çönki üzendä 2013 yılda universiada ütkärergä telägän şähärdä hawa alanı xalıqara standartlarğa turı kilärgä tieş. Annan soñ şulay uq bezgä küp kenä Begişevo hawa alanına zarlanalar, bigräk tä Tatarstannıñ neft töbäkläre belän qızıqsınuçı investorlar. Bıyıl xökümät tarafınnan bu hawa alanı Kamaz şirkäte qaramağına tapşırıldı häm ul şulay uq tizdän tözekländereläçäk.
----------------------------------------------------------------------------------------------
Tatarstanda ictimağıy oyışmalarnı saylawlar qızıqsındıramı?
İctimağıy oyışmalar cämğıyatneñ möhim ber öleşe, şuña da alar respublikada bulğan tege yäki bu xällärgä härdaim üz mönäsäbätlären belderergä tieş, di belgeçlär.
Tatarstanda 4 meñ tiräse ictimağıy oyışma bar. Alarnıñ 25-30ğa yaqını säyäsi eşçänlek alıp bara. Bu oyışmalarnıñ eşçänlege belän qızıqsına başlasañ, alar kübesençä cämäğätçelekkä yabıq bulıp çığa. İsemnären belüçe yuq, programmaları tögäl tügel, elektron säxifäläre az.
İctimağıy oyışmalarnıñ eşçänlegen uram cıyınnarı sanınnan ğına çığıp bäyäläp bulmıy. Xäzer kübese biznesqa kerep kitä, küp kenä tügäräk östäl söyläşüläre alıp barıla. Döres, berara xalıq zur cıyınnardan ardı, läkin xäzer yänä uram cıyınnarın kötä. Çınlıqta isä inqıylabnı xalıqnıñ 5 % da eşli ala."
----------------------------------------------------------------------------------------------
Sportçılar da zur säsättä qatnaşa
Qazanda “Rusiä alğa” digän isem astında Bötenrusiä sport forumı açıldı. Anıñ qısalarında Russiädä massaqüläm sportnı üsterü turında söyläşü buldı buluın, ämma çara nigezdä saylawlarğa bağışlanğan ide. İrtägä anda Rusiä Prezidentına nämzät Dmitriy Medvedevnı kötälär. Bügenge cıyında Rusiä Dumasına saylanğan ataqlı sport ostaları, Rusiädä sportnı bağuçı baş çinovnik Väçeslaw Fetisov, başqa citäkçelär qatnaştı.