Accessibility links

шимбә, 3 декабрь 2016, Казан вакыты 18:48

Xatın-qızlar cıyınında "irlär cämğiättä üz yoğıntısın yuğalta bara" dip äytelde. Sosial, säyäsi häm iqtisadi dairälärdän barlığı 400läp xanım Astanağa cıyıldı.

Yevraziä xatın-qızlarınıñ ikençe sammitın açıp Qazaqstannıñ eşquar xatın-qızları forumı citäkçese Mönäwärä Paltaşeva, bu cıyınnıñ Astanada ütüe – çarağa üzençälekle ber tösmer östi, dide. Qazaqstan – möselman ile, ämma biredä xatın-qızlar dönyanıñ başqa möselman illärendäge xatın-qızlardan ayırıla.

"Ğorurlıq belän äytä alabız, bu sammit Qazaqstan xatın-qızlarınıñ yuğarı däräcäsen kürsätä alaçaq. Alar sälätle, alar äwzem. Alar yaxşı ana häm xatın ğına tügel, alar äle yaxşı citäkçelär dä," dide Mönäwärä Paltaşeva.

Citäkçelär digännän ,Qazaqstan xökümätendä ber genä ministr xatın-qız – yustisiä ministrı Zagipä Balieva. Parlamentta 107 deputatnıñ 17se – xatın-qızlar. Bu yaqınça 15% täşkil itä.

Sammitta Rusiä, AQŞ, Germaniä, Britaniä, Latviä, Üzbäkstan häm Qırğızstan xatın-qızları qatnaşa. Berençe cıyın da 2006 yılda Astanada uzdı, anı Qazaqstannıñ mädäniät häm mäğlümat ministrlığı oyıştırğan ide.

Bügen açılğan cıyında qaralaçaq mäsälälärneñ berse – awır iqtisadi xällär. Ber yaqtan bu awırlıqlar ğailägä töşsä, ikençe yaqtan eşquar xatın-qızlarnıñ eşläre awırlaşa. Xatın-qızlar citäklägän şirkätlär ğadättä zur kapital salınğan ere bizneslar bulmıy. Waq häm urta qullı eşmäkärlek isä xäzer iñ awır xäldä.

"Döresen genä äytkändä küsäkneñ awır başı gel xatın-qızlar cilkäsenä töşä. Zur aqçalar belän eş itüçe bizneslar alar ğadättä irlär qulında bula. Xatın-qızlar xattä urta da tügel, ä keçe bizneslarnı citäkli. Keçe eşquarlarğa bik awır," - dide Almatınıñ Feminist Ligası prezidentı Yevgenia Kozıreva.

Şulay itep cıyınnıñ maqsatlarınıñ berse – xatın-qızlarnıñ eşmäkärlek häm säyäsät dönyasında liderlıq sälätlären häm täcribälären arttıru yulların tabu.

Sammit açılışında şulay uq prezident Nursoltan Nazarbayevnıñ qızı Dariğa da qatnaştı, ämma anıñ çığışı xatın-qızlar arasında eşquarlıqnı üsterü turında bulmadı. Kiresençä, anıñ fikerençä, säyäsät, biznes, fändä xatın-qızlar sanı üsä, ä irlärneñ köçe kimi bara.

"İrlär xatın-qızlar kebek üz üzlären qarıy başladı, kosmetik salonnarda alar xäzer çäçlären kisterep kenä qalmıy, xattä manikur da yasata, monıñ belän alar üzläreneñ ir bulu säläten yuğalta, bumı bezneñ ciñüebez?" - dip söyläde Dariğa Nazarbayeva.

"Bez irlär belän här dairädä köndäşlek itä aluıbıznı isbatladıq, ämma xatın-qıznıñ iñ möhim role ul ana häm xucabikä bulğanın onıtmasqa kiräk," - dide prezident qızı.

Dariğa xanım Qazaqstannıñ berençe prezidentı fondın citäkli. 45 yäşendä anıñ 3 balası, ber onığı bar.

"Böten dönyada xatın-qızlarnı irlär tarafınnan censi ezärlekläwgä qarşı köräşergä çaqıralar." Şayartıp, Dariğa Nazarbayeva, "bezgä bu turı kilmi, bezgä näq irlärneñ bäylänüläre citmi," – dide.

İre Raxat Aliev belän Dariğa xanım ayırıldı. Prezident kiyäwenä Qazaqstanda xakimiätne üz qulına alu maqsatı belän fetnä oyıştıruda ğäyepläw belderelde.
XS
SM
MD
LG