Accessibility links

сишәмбе, 6 декабрь 2016, Казан вакыты 06:04

"Татар иле" ни сәбәпле көрчеккә терәлгән?


Татар җәмәгатьчелегендә зур кызыксыну уяткан, күп акчалар тотылып та, һаман ачылмаган "Татар иле" социаль челтәре җитәкчесе Раил Гатауллин Азатлык сорауларына җавап бирде.

"Татар иле" дип аталган социаль челтәр башта 2011 елда ачыла дип вәгъдә ителгән иде. Соңрак ул 2012 елның апрель аена, Тукай көненә кичектерелде. Анда да ачылмаган проектны 2012 елның декабрендә татар корылтае көннәрендә ачарга вәгъдә иттеләр. Корылтайда тәкъдим итү чарасы булса да, проект әлегәчә тулы көченә эшләп китмәгән. Хәзер аны 31 мартка вәгъдә итәләр.

Шушы тоткарлыкның сәбәбе нәрсәдә, проектның нинди проблемнары бар, дигән сорау белән Азатлык хәбәрчесе "Татар иле" социаль челтәре җитәкчесе Раил Гатауллинга мөрәҗәгать итте.


Раил Гатауллин сүзләренчә, “Татар иле” интернет проектының озакка сузылуы аның киң масштаблы проект булуына бәйле. “Безнең вакытны проектта файдаланылган ресурсларның авторлык хокукларын хәл итү алды”, дип белдерде ул.

Раил шулай ук проектның финанс мәсьәләсенә кагылышлы сорауга да җавап бирде. Аның сүзләренчә, проектка бүленгән 15-17 миллион сум (Раил үзе 14.8 миллион дип төзәтте -- Р.Ш.) акчаның яртысы “Татар иле” интернет челтәренә тотылган, ә калганы мобиль телефоннар өчен Андроид операцион системасын татарчага тәрҗемә итүгә, энциклопедия эшләүгә, “Татар иле” проекты кысаларында интернет челтәренә татар китапларын урнаштыруга, Татар конгрессының техник базасын булдыруга һәм башкаларга тотылган.

Бүгенге көндә “Татар иле” проектының төп проблемы итеп Раил проект такымының тулысынча тупланып, эшнең җайга салынып, механизмының эшли башламавында күрә. Социаль челтәрнең киләчәктә модерациясен алып баруны да шулай ук уйлап җиткерәсе бар икән.

Раил Гатауллин проект берара Татар конгрессы канаты астында эшләгән вакытта бигрәк тә финанс проблемнарына тап булуларын, җәй көне бу мәсьәләләрне чишүне сорап Татарстан министрлар кабинетына мөрәҗәгать иткәч, Татар конгрессының бу проекттан читләшергә теләвен дә әйтеп үтте.

Хәзер проект җитәкчесе “Татар иле” социаль челтәренең 31 мартта тулы көченә эшли башлаячагын белдерде. “Без үзебезгә март ахырына кадәр татар халкына “Татар иле”ндә теркәлеп, татарча аралашу, үз төркемнәрен җыеп сөйләшү мөмкинлеген тудыруны максат итеп куйдык”, диде ул.

Гатауллин Татарстанда дәүләт дәрәҗәсендә татар интернетының проблемнарын аңлап, аны үстерүгә ярдәм итә торган фонд булырга тиеш дип саный.

9 гыйнварда Татарстан Министрлар кабинетында премьер-министр Илдар Халиков җитәкчелегендә “Татар иле” социаль челтәренә кагылышлы зур гына киңәшмә үтте. Журналистлар өчен ябык узган бу киңәшмәдә Халиков бу проект белән кызыксынуын һәм проблемнарны тиз арада чишәргә кирәклеген әйткән.

фикерләрне күрсәт

XS
SM
MD
LG