Бразилия көндәлеге

19 июнь. Сигезенче көн

Бразилиядә хәлләр кыза бара. Кемдер бәйгенең киләсе өлешенә чыга, кемдер төшеп кала һәм кайту билетларын кайгырта башлый. Атнакич Колумбия Кот-д'Ивуарны җиңеп (2-1) 1/8 финалга узган өченче такым булды (Нидерланд һәм Чили белән). Ә менә Англия Уругвайга җиңелеп (1-2) бәйгедә калу шансын югалтты дияргә була. Уэйн Руни (ниһаять!) беренче тубын кертсә дә, Англия Уругвайны җиңә алмады (1-2) һәм 1/8 финалга чыга алмас кебек. Кызганыч..

20 июнь. Тугызынчы көн

Бу чемпионат көтелмәгән сюрпризларга бай булачагын кабат раслады. Белгечләр тарафыннан "үлем төркеме" дип аталган D төркемендә алдан ук "корбан" дип билгеләнгән Коста-Рика икенче уенны да җиңеп (бу юлы Италияне 1-0) төркемнән беренче булып 1/8 финалга чыкты. Фаворит саналган Англия бәйгедән төшеп калды, Италия соңгы уенда икенче урын өчен көрәшергә мәҗбүр. Көннең икенче уенында Франция "ярым мөселман" Швейцария җыелмасы капкасына биш туп кертеп (5-2) бәйгенең киләсе өлешенә чыккан бишенче такым булды.

21 июнь. Унынчы көн

Шимбә көнне Бразилиядә барган дөнья беренчелегендә чираттагы өч уен уйналды, өчесендә дә Татарстанга катышы булган футболчылар катнашты. Хәзерге вакытта Рубин өчен уйнаучы ганалы Мөбәрәк Вакасо Германия-Гана уенында үз иленең данын яклады. Рубин капкачысы булган иранлы Алириза Хагиги Аргентина-Иран уенында Иран капкасын 90 минут буе коры тотты, бары тик соңгы минутта гына Лионель Месси гол кертеп яңа сенсация туарга ирек бирмәде. Ниһаять, Нигерия-Босния уенында заманында Чаллыда яшәгән һәм КамАЗ өчен уйнаган, әнисе татар булган Питер Одемвингие Босния капкасына гол кертеп үз иленә җиңү китерде.

22 июнь. Унберенче көн

Чемпионатның унберенче көнендә Русия Бельгиягә оттырды (0-1) һәм үзенә киләсе өлешкә чыгуны шактый авырайтты. Хәзер Капелло шәкертләренә соңгы уенда Җәзаирне җиңәргә кирәк. Гарәп егетләренең Корея белән ничек уйнаганын искә алганда (4-2), бу җиңел эш түгел. Көннең өченче уенында Португалия янә аптыратты — АКШка җиңелүдән көч-хәл белән котылып калды (2-2). Рональдо бу юлы да гол кертә алмады.

23 июнь. Уникенче көн

​Бүген A һәм B төркемнәрендә соңгы уеннар уйналды. Нидерланд Чилины җиңеп (2-0) төркемдә беренче урынны алды, Чили -- икенче. A төркемендә Бразилия Камерунны (4-1) җиңеп беренче урын, Мексика Хорватияне (3-1) җиңеп икенче урын алды. Шулай итеп, 1/8 финалның беренче ике пары билгеде булды. 28 июньдә Бразилия белән Чили, 29 июньдә Нидерланд белән Мексика уйнаячак.

24 июнь. Унөченче көн

Унөченче көн көтелмәгән нәтиҗәләр һәм әкәмәт хәлләр белән истә калды. Италия-Уругвай уенында Италия сакчысы Джорджо Кьеллини Уругвай һөҗүмчесе Луис Суаресны аның җилкәсен тешләүдә гаепләде. Әйтергә кирәк, бу Суаресның мондый беренче кыланышы түгел. Уеннан соң ул бу хәлне "көрәш" дип атады, янәсе аның да күзенә бәргәннәр.

Көтелмәгән нәтиҗәләргә килгәндә, Испаниядән соң Италия белән Англия дә 1/8 финалга үтә алмыйча төшеп калды. Ике атна элек мондый хәлне беркем дә күз алдына китерә алмас иде. Бу чемпионат Көньяк Америка тантанасы булырга охшап тора. 1/8 финалның тагын ике пары билгеле булды:

28 июнь Колумбия—Уругвай һәм 29 июнь Коста-Рика—Греция

25 июнь. Ундүртенче көн

Бүгенге F һәм E төркемнәрендә соңгы уеннар уйналды. Нигерия Аргентинага җиңелсә дә (2-3) такымнарның икесе дә 1/8 финалга чыкты. E төркеменнән киләсе өлешкә Европа такымнары -- Франция һәм Швейцария үтте. Шулай итеп, тагын ике пар билгеләнде:

30 июнь Франция—Нигерия һәм 1 июль Аргентина—Швейцария

26 июнь. Унбишенче көн

Бүген G һәм H төркемендә соңгы уеннар уйналды. Германия АКШны җиңеп (1-0) киләсе өлешкә үтте. Ә менә Португалия Гананы җиңсә дә (2-1) төшеп калды. H төркемендә Русия Җәзаиргә абынды (1-1), нәтиҗәдә киләсе өлешкә гарәп егетләре узды, Русия кайтып китә.

Шулай итеп, 1/8 финалның бар парлары да билгеле (уң як баганада). Җомга көнне чемпионатта бер көнлек тәнәфес. 28 июнь, Рамазан ае белән бергә, 1/8 финал уеннары башлана.