Accessibility links

дүшәмбе, 5 декабрь 2016, Казан вакыты 19:53

Ariel Şaron haman añında tügel, anıñ mienä nindi zian kilüe bilgesez


İzraildä bügen şabad, yähüdlärneñ izge köne, alarnıñ zur öleşe anı qatı awıru kiçergän premyer-ministr Ariel Şaron sawlığı öçen doğalar belän ütkärä. Tabiblar ul arada inde öçençe kön can saqlaw bülegendä yatqan Şaronnıñ ğömere öçen köräşen däwam itä.

"Soñğı tomografiä näticäläre elekkesenä qarağanda yaxşıraq bulsa da, Şaronnıñ xäle bik citdi qala birä", di Yirusalim xastaxänäseneñ mödire Şlomo Mor-Yosef. Şimbä irtän yaña tomografiä yasalsa da, kiñräk mäğlümat älegä birelmäde, tabiblar şabad tämamlanuın kötä. Alar şulay uq, Şaronnıñ mienä nindi zian kilüen älegä tulısınça açıqlaw mömkin tügel, çönki ul haman da añına kilmäde, oyığan kileş yata dip belderä. Ämma niçek kenä bulmasın, alar Şaronnıñ kire ictimaği tormışqa qaytu ixtimalın inde küz aldına kitermi kebek, häm bu İzraildä dä, annan çittä dä, Ariel Şaronnıñ säyäsättän kitüe nindi näticälärgä kiterä ala digän borçulı sorawlar uyata.

"Äye, min bik borçılam, di Yirusalimdä yäşäwçe bu xanım. Kiläçäktä ni bulası xäzer bilgesez. Şaron xäzerge wäzğiatneñ umırtqası ide, añardan başqa ni bulasın küz aldına kiterü dä qurqınıç."

Ariel Şaronnıñ xäle häm monıñ Yaqın Könçığışta yaña totrıqsızlıq çığaruğa kiterä alu ixtimalı säbäple Quşma Ştatlarnıñ däwlät sekretare Condoleezza Rice üzeneñ Australiä häm İndoneziägä planlaştırğan räsmi säfären kiçekterergä buldı. Şaronnıñ kitüe İzraildä, ğomumän Yaqın Könçığışta urnaşqan säyäsi wäzğiattä zur buşlıq tudıra ala digän qurqular zur. Ğäräp dönyasında İzrail premyer-ministrın yaratmasalar da, Könbatışta kiresençä, Şaron Gaza sızığınnan kitep solıx söyläşüläre öçen yaña yullar äzerläde dip isäplilär.

Kärim Kamal
XS
SM
MD
LG