Accessibility links

якшәмбе, 4 декабрь 2016, Казан вакыты 13:19

Putinneñ Merkel belän Tomski oçraşuı - yaqlar kütärenke belderülär yasıy


Atnakiç Seberdäge Tomski şähärendä Germaniä häm Rusiä citäkçeläreneñ yuğarı däräcäle oçraşuı tämamlandı, xörmätle tıñlawçılar. Ul ike yaqnıñ da qänäğät qaluın beldergän süzlär belän yabıldı. Berlin häm Mäskäw üzara säwdäne, xalıqara mäs''älälärdäge xezmättäşlekne arttıru turında söyli.

Vladimir Putinneñ kansler Merkelnı Tomskidä qabul itüe yuqqa tügel - Seberdäge şuşı şähär Rusiä almannarı uqmaşıp yäşägän urın bulıp tora. Ölkädä äle 1998-nçe yılda uq alarnıñ milli-mädäni moxtariate qorılğan ide, anda almannarnıñ lüteran häm katolik çirkäwläre eşläp kilä. Ğomumän alğanda ölkädä 17 meñläp german yäşi, xucalıq citäkçeläre, fän ähelläre arasında da alar şaqtıy. Ölkä xakime Viktor Kress üze Rusiä almanı.

Şuña kürä Vladimir Putin Germaniäneñ berençe xatın-qız kanslerı Angela Merkelne Tomskigä çaqırıp, Mäskäw belän Berlin arasında qorı säyäsi xezmättäşlek kenä tügel, elekke kansler Schroeder çorına xas dustanä mönäsäbätlär urnaştırırğa da teli kebek. Rusiä prezidentı şul maqsatqa ireşü öçen Tomskidä küp närsä eşläde, monı anıñ anda yasağan belderüläre yaxşı kürsätä.

Soñğı aralarda Rusiäne dönyanıñ töp yağulıq çığanağına äyländerü niäte belän yörgän Vladimir Putin şul yaratqan temasın Tomskidä dä kütärde:

"İnde belüegezçä, bıyıl Rusiä "sigezlek"tä räislek itä, häm anıñ töp östenleklärennän berse bulıp energiä mäs''äläse tora. Bez şuña ömetlänäbez - yağulıq ölkäsendäge şuşı aralaşu bezgä yaña urtaq proyektlar başlawğa bulışa ala, ä bu isä Yewropanıñ da, başqa dönyanıñ da totrıqlı iqtisadi wä sotsial'' üseşenä yardäm itäçäk", dip añlata Vladimir Putin Germaniäneñ Rusiä belän tığız xezmättäşlek urnaştıruı faydaların.

Mäskäw Yewropağa yağulıq satu belän çiklänmiçä, annan investitsiälär dä kötüen äytä. Merkel belän oçraşu üze Rusiäneñ baylıq bazı sanalğan Seberdä uzdı, şunıñ qısalarında anda Rusiä-German eşmäkärläreneñ zur cıyını da oyıştırılğan ide häm şunda çığış yasap Putin, älege töbäkneñ zur iqtisadi potensialın, tabiği baylıqların häm fänni mömkinleklären maqtadı.

Ä Merkel belän kilgän german eşmäkärläre şaqtıy ide. Bu german xökümäteneñ Rusiä belän mönäsäbätlärgä nindi ähämiat birüen yaxşı kürsätä, dip isäpli Germaniä kanslerı:

"Minem belän nindi wäkillek kilüe bezneñ Rusiä belän mönäsäbätlär ähämiaten, minemçä, bik yaxşı kürsätä. Rusiä mädäniatına häm Rusiä investitsiälärenä ixtiac Germaniädä zur. Bu german mallarınıñ yarışa aluın ğına tügel, ä Rusiä iqtisadınıñ da zamançalaşuın kürsätä. Bezneñ bu eştä qızıqsınu zur", di german kanslerı Angela Merkel.

Qızıqsınu Rusiä yağında da zur - Tomski söyläşülärendä qatnaşqan ministrlarnıñ sanı, eşmäkärlärnıñ däräcäse şunı kürsätä. Moñardan tış, ğömereneñ küpmeder öleşen kommunistik GDR-da ütkärgän Vladimir Putinneñ german xolqına, german mädäniatına mäxäbbäte dä mäğlüm. Anıñ xakimiatendä Mäskäwneñ Berlin belän mönäsäbätlärgä iğtibarı härzaman yuğarı buldı.

Kärim Kamal
XS
SM
MD
LG