Accessibility links

сишәмбе, 6 декабрь 2016, Казан вакыты 15:12

Törkiädän Atnalıq Küzätü


Törkiädä kötelgän möhim qunaq AQŞ tışqı eşlär ministrı Condoleezza Rice 25 Apreldä kilep, biredän Bagdatqa oçtı. Anı Ankarada kollegası Abdullah Gül, Premier Tayyip Erdoğan hem Prezident Ahmet Necdet Sezer qabul ittelär. İke yaqlı oçraşularda İran, PKK, Ğıyraq, Fälästindä xakimiätkä mengän Hamas väkileneñ Ankarağa vizitı, AQŞ-nıñ kiñäytelgän Yaqın Könçığış proyektı, Törkiä-Gretsiä mönäsäbätläre häm Kiper köntärtibenä mengän mäsälälär buldılar. Riceneñ, PKK belän köräş mäsäläsendä Washington Törek ğäskärläreneñ tönyaq Ğıyraqqa kerüwen telämi, çönki mondıy ber adım biredä stabilsezlek tudırır dip äytkän buluwı mäğlüm buldı. Tabiği bu Ankaranı xiç tä qänäğätländermäde. İran mäsäläsendä isä Rice Törkiäne AQŞ saflarında kürergä teläwen äytte. Törek yağı isä BMO Qurqınıçsızlıq Sovetı qararı bulmıyça torıp İranğa qarata ber nindi dä adım atlaw döres bulmas dip añlarğa birgän. Qısqası soñğı waqıtlarda ike yaqlı mönäsäbätlärdä kileşmäwçänleklärneñ arta baruwı bilgele ber fakt. Şul säbäple dä Rice belän Gül ike yaqlı mönäsäbätlärdä kiläçäktä strategik urtaqlıq buldıru öçen “urtaq qaraş dokumentı” äzerläw buyınça urtaq fikergä kilgän buluları turında belderdelär. Qısqası Ricenıñ vizitı ike yaqnıñ pozitsiälären berberenä añlatudan alğa kitmäde dip äytergä bula. Ricenıñ vizitı waqtında Fälästin İdaräse Citäkçese Mäxmud Abbas ta Premier Erdoğannıñ qunağı bularaq Ankarada ide. Rice belän Abbas oçqıçlar maydanında oçraşıp, ayaq ürä küreşep tä aldılar.

Tege yaqtan könyaq könçığıştağı xärbi operatsiälär kötelgänçä Riceneñ vizitı belän başladı. Tik, 1999 yıldan soñ berençe märtäbä bularaq Törek Qorallı Köçläre (TQK) şundıy zur külämdä xärbi büleklärne Ğıyraq belän İran ciklärenä cıyğan ide. Yuğarı däräcäle ofitserlarnıñ belderüwenä kürä, şuşı operatsiä terroristlarnıñ çikne ütep kerüwen buldırmasqa, häm şulay itep Törkiä eçendäge terroristlarnı yuq itärgä isäplängän.Şulay 26-nçı Apreldä Tuncelidäge bäreleşlärdä 2 ğäskär şähit buldı, ber ofitser yaralandı.

TQK-nıñ şundıy zur ber xärbi operatsiä alıp barırğa cıyınuwı PKK-nıñ çit illärdäge taraftarların da qatı borçıdı. Parijdağı Törek İlcelegeneñ viza bülege urnaşqan konsullıq binasına molotof kokteyle dip atalğan binzin tutırılğan şeşälär ırğıtıldı. Şuşı xöcemnän cäräxätlänüçe bulmağan. Angliäneñ London şähärendäge öç Törek bankası byurosına tönge säğatlärdä şulay uq binzin şeşäläre belän xöcem itelgän. Turkish Banknıñ 2 byurosı belän Ziraat bankasınıñ byurolarında maddi zian ğına bulğan.

“Bugün” gazetası korrespondentı Lale Sarıibrahimoğlunıñ, TQK-neñ mäxsus berlekläre Tönyaq Ğıyraq cigen ber niçä km. ütep kerep çikkä yaqın awıllardağı PKK partizannarına xöcemnär başlağannar digän 25-nçe Apreldäge xäbäre soñğaraq başqa gazeta häm televiziälär tarafınnan da täsdiqlände. Ğıyraq Tışqı Eşlär Ministere Hoşyar Zebani da Bagdadtağı Törek İlçese Ünal Çevikgözgä vizit yasap şuşı xärbi xäräkätneñ tuqtatuluwın taläp itte. Tege yaqtan Ğıyraqnıñ Ankaradağı ilçese Sabah Omran da Törkiäneñ Ğıyraq buyınça Mäxsus väkile Oğuz Çelikkoluğa vizit yasap şuluq taläpne qabatlağan. Ğıyraqnıñ yaña Prezidentı Cälal Talabani Törkiä belän Ğıyraq arasında 1990-nçı yılda terroristlarnı qulğa elekterü öçen çikne 15 km. ütep kerergä irek birgän kileşüneñ köçtän çıqqan buluwın däğvä itä.

Xärbi operatsiä turında Generalştab başlığı armiä generalı Hilmi Özkökkä jurnalistlar soraw birgäç, ul “bu turıda başqalar çawap birsen” digän. Tışqı Eşlär Ministerlege dä Ğıyraq birgän notağa “här yıl yaz aylarında mondıy çaralar kürelä, Ğıyraq PKK-nıñ aktiflıqların betersen” dielgän. Qısqası Törkiä, bu xätle zur operatsiä başlağannan soñ, PKK belän köräş mäsäläsendä taşlamalar yasarğa cıyınmas.

Äxtäm İbrahim, İstanbul
XS
SM
MD
LG