Accessibility links

пәнҗешәмбе, 8 декабрь 2016, Казан вакыты 03:23

1 sintäberdä Belsan mäktäbendä totıqlar alınuğa 2 yıl tuldı


1 sintäberdä böten Rusiädä balalar yaña uqu yılın başlaw bäyrämenä cıyıldı. Uqıtuçılarına büläk itärgä dip çäçäk bäylämnäre kütärep kilgän uquçılar yaña uqu yılınıñ berençe qıñğırawın işette.

Tik Beslanda 1-nçe sintäberdä bäyräm tügel, matäm qıñğırawları yañğıradı.

Beslanda yaña uqu yılı 5 sintäberdän başlana. Añarçı 2 yıl elek Tönyaq Osetiädäge Beslannıñ berençe mäktäbendä bulğan ütereş qorbannarın iskä alalar. Ul çaqta 3-nçe sintäberdä 330dan artıq bala, ata-ana häm uqıtuçı hälak buldı. Bügen beslanlıar 1-nçe mäktäp sportzalı xaräbäläre yanına cıyıldı. Näq 2 yıl elek Çeçnädän Rusiä ğäskärlären çığarunı taläp itüçe qorallı suğışçılar biredä 1100dän artıq keşene totıq itep alğan ide. Bügen biregä xalıq çäçäk bäylämnäre belän kilde, iskä alu şämnäre yandırdı.

Azatlıq radiosınıñ rus redaksiäse xäbärçese Oleg Kusov Beslandağı wäzğiät turında "Xislär bik awır. Xatın qızlar cılıy, qayberläre ayaqtan yığılırğa tora. Qıçqırğan tawışlar işetelä. Beslan xalqı bu könnärne matäm belän ütkärü öçen zur çaralar ütkärmäwne sorap möräcäğät itte" dide.

Mäktäp xärabäse Rusiä iminlek köçläre kinät başlağan tärtipsez höcümnän soñ bulğan bäreleş, şartlawlar, yanğın turında söyläwçe ber dälil bulıp äle dä tora.

Xäbärçebez äytüençä, mäktäp äle dä höcümnän soñğı xälendä saqlana.

"Mäktäp haman yabıq tora. Sportzalğa ğına kerep bula. Mäktäptä 3-nçe sniätberdä bulğan şturmnıñ barlıq ezläre dä äle saqlana. Tärzälär watıq, tübä cimerek. Mäktäp törle illärdän kiterelgän çäçäk bäylämnäre belän uratıp alınğan" di Kusov.

Bügen Beslan ziratında totıq aluçılar belän bäreleştä hälak bulğan iminlek xezmätkärlärenä häykäl dä açıldı.

Matäm 3-nçe sintäbergä qädär däwam itäçäk. Matäm çaraları arasında Rusiä muzıka yoldızlarınıñ matäm konsertı, ber minut tınlıq, härber qorban xörmätenä kükkä berär aq şar oçıru da bar.

Mäskäwdä isä şähär xakimiätläre Beslan qorbannarın iskä alu carası ütkärüne tıydı. Keşe xoquqların yaqlaw oyışmaları Mäskäwdä 3-nçe sintäber könne matäm mitingı ütkärergä röxsät sorap möräcäğät itkän ide.

Rusiäneñ Watandaşlar Yardäme isemle xoquq yaqlaw törkeme citäkçese Svetlana Gannuşkina "Minemçä bu waqıyğağa iğtibar cälep itelüen, keşelärneñ borçıluın telämägängä kürä tıydılar. Çönki Beslan waqıyğaların räsmi räweştä tikşergän komissiä obyektib näticä yasamadı, keşelärneñ üleme öçen ğäyeplelär kürsätelmäde. Xakimiätlär xäzer Beslan turında küp häm işetelerlek itep söyläwne telämi" dide.

Beslan mäsäläsendä xökümätkä ışanmaw haman da bik köçle bulıp qala birä. Bu atnada Levada üzäge ütkärgän ber fiker beleşügä qarağanda rusiälelärneñ barı 5 protsentı ğına xakimiätlär Beslan turında döresen söyli dip isäpli.

Beslan mäktäbendä isän qalğannar häm qorbannarnıñ tuğannarı Rusiä räsmilären matäm çaralarınnan çittä torırğa çaqırdı. Küpläre, räsmilärneñ döreslekne yäşerergä häm cawaplılıqtan qaçarğa tırışuı bezneñ qayğıbıznı tağın da tiränänäytä genä di.

Naif Aqmal, Praga.
XS
SM
MD
LG