Accessibility links

шимбә, 10 декабрь 2016, Казан вакыты 17:43

Ecuadorda prezident saylawları. Könyaq Amerikanıñ bu ilendä dä xakimiätkä sulçı kilergä mömkin


Könyaq Amerikanıñ Ecuador ilendä bügen prezident saylawları. Bu urınğa 13 namzät däğwa itä, läkin töp köräş elekke Finans ministrı Rafael Correa belän ilneñ iñ bay keşese Alvaro Noboa arasında bara. Sulçı Rafael Correa Venezuela prezidentı Hugo Chavesnıñ yaqın tarafdarı sanala, häm ciñgän oçraqta, ildä "watandaşlar inqilabı" başqarırğa, konstitutsiäne üzgärtep yazarğa, korrupsiäneñ tamırın qorıtırğa, Quşma Ştatlardan çitläşergä wäğdä itä.

Correa Washington belän irekle säwdä tärtiben tuqtatıp torırğa cıyına, anıñ fikerençä, bu ilneñ yarlı awıl keşelärenä zıyan kiterä. Şuşı niätenä basım yasap ul saylaw aldı kompaniäse waqıtında qayışın çıbırqı sıman şartlatıp yörde.

Anıñ köndäşe – dönyada iñ zur banana plantatsiäse xujası millioner Alvaro Noboa, kiresençä, Quşma Ştatlar belän mänäsäbätlärne saqlap qalırğa cıyına. Ul yaña eş urınnarı buldırırğa wäğdä itä, iqtisadnıñ üseşe yarlılar öçen dä baylar öçen faydağa bulaçaq di:

"Bez eş urınnarı, toraq, sälämätlek, mäğärif dibez. Yılına 300 meñ fatir. Turizm tarmağında 1 million eş urını, tözeleştä 2-3 million, awıl xujalığın üsteräçäkbez" di millioner Noboa.

İrekle säwdä mäsäläsenä kilgändä, ul kileşüne imzalarğa, läkin anı ğämälgä quyunı kiçekterep torırğa cıyına:

"Min anı imzalayaçaqmın, läkin Ecuador fermerları öçen 10 yıl sorayaçaqmın, alarnı texnika, orlıqlar, su sibü sistemı belän täemin itääçäkmen" di Alvaro Noboa.

Prezident bulu öçen tawışlarnıñ 50%tan artığın, yä isä, 10% östenlek belän 40% cıyarğa kiräk. Yuq isä, 26 Noyäberdä ike töp namzät arasında ikençe tur ütäçäk.

Soñğı 10 yılda Ecaudorda 3 prezident yä uramda, yä kongresstağı çualışlar näticäsendä citlätelde. Saylawçılarnıñ kübese bu yulı da ällä ni ömet bağlamıy:

"Alarnıñ qaysısı berär närsä üzgärtä ala soñ? Berse dä! Kem genä saylanmasın, näticäse şul uq bulaçaq" di başqala Quitotağı bu keşe.

Soñğı fiker beleşülärgä qarğanda Rafael Correa beraz ğına aldaraq bara. Küzätüçelär fikerençä, ul ciñep çıqsa, And tawları töbägendä tağın ber sulçı citäkçe päyda bulaçaq. Quşma Ştatlarğa qarşı torırğa tırışqan Venezuela prezidentı Hugo Chaves belän Bolivia prezidentı Evo Moralesnı sanamağanda, Braziliä belän Çilida da soñğı yıllarda sulçı prezidentlar saylanğan ide.

Ali Ğilmi
XS
SM
MD
LG