Accessibility links

шимбә, 10 декабрь 2016, Казан вакыты 04:15

Söğüdilär Washingtonnıñ Ğiraqtağı yaña planına bik saq qına xuplaw belderä


Quşma Ştatlarnıñ däwlät sekretare Condoleezza Rice Yaqın Könçığış säfären däwam itep sişämbedä söğüd patşası Ğabdulla belän oçraştı. Mäğlüm ki, amerikan däwlät sekretare töbäktäge illärneñ citäkçelegennän Washingtonnıñ Ğiraqtağı yaña strategiäsenä yaqlaw qazanırğa teli. Mısır prezidentı monı inde eşläde, ä menä söğüdilär mäs''älägä bik saq kilä.

Riadqa kilep töşkäç tä Rice başta söğüd patşası Ğabdulla belän oçraştı. Soñraq ilneñ tışqı eşlär ministrı Söğüd äl-Fäysalnı kürep söyläşkännän soñ ul, söğüd yağı Ğiraq mäs''äläsendä bezgä qarata bik yardämçel buldı, dip belderde:

"Bezneñ maqsatlarıbız urtaq, ä ul şunnan ğibarät - berdäm, territorial'' bötenlege saqlanğan, çittän eşlärenä tıqşınılmağan, bar xalqına da bertigez qaralğan, dinenä wä millätenä qaramıy yaqlanğan Ğiraq", dip añlata söğüd wä amerikan qaraşlarınıñ asılda urtaq bula aluın Condoleezza Rice.

Ämma söğüd yağı mondıy kütärenke ruxtağı belderügä saq belän qarıy. Ministr äl-Fäysal barı tik, bezneñ xökümät amerikannarnıñ Ğiraqtağı wäzğiätne uñay yaqqa üzgärtä aluına ömetlänä , digän şaqtıy qorı süzlär belän genä çiklände. Ä inde Ğiraqtağı xökümätneñ nindi dä bulsa xälitkeç çaralar kürä aluına Riadta ğomumän şiklänep qarıylar.

Ğäräp dönyasında küplär Ğiraqnıñ şığıylar östenlek itkän xäzerge xökümäte sönnilär xisabına nigezdä kürşe İrannıñ mänfäğätlären yaqlıy digän qaraşta tora.

Dubaydağı Qultıq tikşerenü üzäge belgeçe Mostafa Alani fikerençä, Ricenıñ şuşı säfären tulayım bäyälärgä äle irtäräk bulsa da, töbäktäge ğäräp illäreneñ Washington säyäsäten yaqlawı elekkegä qarağanda yuğarıraq kürenä.

"Töbäktä, bigräk tä Ğiraqta İrannıñ tıqşınu säyäsäte yoğıntısı, tiskäre yoğıntısı sizelä. Şuña da töbäkneñ moña qarşı toru öçen Quşma Ştatlar belän berläşü mänfäğäte bar. Ämma problema şunda ki, alar Quşma Ştatlarğa bik ışanmıy. Alarnı ışandıru, garantiä kiräk. Alar Quşma Ştatlarnıñ çınnan da totrıqlılıq teläwen, Quşma Ştatlar säyäsäteneñ monı maqsat itep quyuın kürsätkän ğämällären kürergä teli", di Yaqın Könçığış belgeçe Mostafa Alani.

Alani fikerençä, xäzer Quşma Ştatlar öçen Yaqın Könçığıştağı möhim problemalarnı xäl itü öçen bik uñay waqıt tudı häm Washington moñardan faydalanıp qalırğa tieş.

"Xäzer tirälek üzgärep bara. Quşma Ştatlar töbäktäge illärneñ yardämenä moxtac, şuña da min xäzer, Quşma Ştatlarnıñ bu şartlarda ni eşli aluın häm töbäktäge illärneñ aña bu problemarında niçek yardäm itä aluın açıqlaw öçen bik uñay waqıt dip uylıym", di Mostafa Alani, Dubaydağı tikşerenü üzäkläreneñ bersendä eşläwçe belgeç.

Alani, İrannıñ däğwaları artuına borçılğan ğäräp illäre arasında xäzer yaña strategik berlek qorılıp kilä, aña Mısır, Ürdün, Söğüd Ğäräbstanı, Farsı qultığı illäre kerä, dip isäpli.

Kärim Kamal
XS
SM
MD
LG