Accessibility links

дүшәмбе, 5 декабрь 2016, Казан вакыты 23:44

Kuba citäkçese belän söyläşkän Chavez Castronıñ yäşäw öçen köräşüen belderde


Kuba prezidentı Fidel Castronıñ iñ kürenekle berektäşlärennän berse Venesuela prezidentı Hugo Chavez Castro yäşäw öçen köräşä dip belderde. Ul monı comğa könne Rio de Janeyroda Könyaq Amerika illäre sammitında açıq itep äytte. Kuba komunist citäkçeläre inde aylarça Castronıñ xäle turında mäğlümätne zur däwlät sere itep saqlap kilergä tırışa. Häm bu küp kenä imeş-mimeşlär taraluğa da säbäp buldı.

Chavez äytüençä, küptän tügel ul Castro belän telefon aşa söyläşkän häm Castro aña yäşäw öçen köräşüe turında beldergän.

Chavez Castronıñ bu köräşen anıñ 50 yıl elek Kubanıñ Sierra Maestra tawlarında Kuban inqilabın oyıştıru köräşe belän çağıştırdı.

"Ul bik qıyın xäldä. Fidel tağın Sierra Maestra tawında. Ul üz tormışı öçen köräşä. Belep bulmıy. Bez anıñ sälamätlänüen häm aqrınlap alğa baruın telibez. Aña siksän yäş. Ul üze dä alar tözätäse maşina inde 80 yıllıq dip äytte" dide Chavez.

Castronıñ sälamätlege naçarayu yül ayında anı xakimiätne waqıtlıça bertuğanı Raulğa tapşırıp torırğa mäcbür itte. Soñğı arada İspaniä matbuğatı yül ayınnan birle cämäğätçelekkä kürenmägän 80 yäşlek Castro 3 uñışsız operatsiä kiçergännän soñ bik naçar xäldä dip yaza.

Chavez 3 säğätlek çığışında şulay uq Quşma Ştatlarnı Venezuelağa bärep kerergä cıyınuda ğäyepläde.

"Chaveznı Säddam belän çağıştıralar. Alar şulay uq Usama bin Ladenğa da tiñläp kilälär. Alar bezne inde yıllarça Kuba belän ber däräcädäge qurqınıçlı illär isemlegenä kertep kilälär. Alar Venezuelağa bärep kerergä telilär" dide Chavez.

AQŞ senatınıñ yaña citäkçese Harry Reid Chavez çığışına qädär berniçä säğät kenä elegräk Venezuela citäkçesen Quşma Ştatlarğa yanawçı iñ zur qurqınıçlar rätenä kertkän ide.

Waşingtonda İlküläm Matbuğat Klubında çığış yasap Reid Chavez Castro belän bergä Latin Amerikasındağı yäş demokratik illärgä sulçı täesir yasarğa tırışa dide.

Chavez isä 10 Könyaq Amerika ile citäkçese oçraşuında Reid yalğışa dip belderde.

Minemçä Könyaq Amerikadağı sulçılıq bar dönyağa taralırğa tora, çönki bezgä kiräkle üzgäreşlärne barı sulçılar ğına täemin itä ala dide Chavez.

Chavez şulaw uq Salqın Suğış çorında Latin Amerikasında yañğırağan elekke sulçı şiğarlärne dä qabatlap "Härçaq ciñügä. Watan, sotsializm yäki ülem. Bez ciñäçäkbez" dip qıçqırdı.

Uzğan dikäber ayında tağın 6 yılğa prezident itep saylanğan Chavez fikerençä 21 ğasır sotsializmı öçen tabiğät baylıqlarına häm eşmäkärlekkä däwlät kontrole köçäytelergä tieş.
XS
SM
MD
LG