Accessibility links

якшәмбе, 4 декабрь 2016, Казан вакыты 21:28

Äl-Qaidä Bushnı Ğiraqqa kübräk ğäskär cibärergä çaqıra... yuq iter öçen


Äl-Qaidä citäkçese urınbasarı Ayman Äs-Zäwähiri amerikan prezidentı George Bushnıñ Ğiraqqa östämä ğäskär cibärü planın mısqıllağan belderü yasadı. Washington bu östämä köçlär belän Bağdadnı ğisyançılardan arındırırğa ömetlänä. Zäwähiri, Bushqa möräcäğät itep, xärbilärne kübräk cibäregez, alar yuq iteläçäk dip kisätte.

Düşämbedä internetta urnaştırılğan ber video yazmada Äl-Qaidä citäkçese urınbasarı Ayman Äs-Zäwähiri amerikan prezidentı George Bushnı Ğiraqqa kübräk ğäskär cibärergä öndäde:

"Bush sataşıp üzeneñ soñğı çığışında Ğiraqqa tağın 20 meñ xärbi cibäräçägen söyläde. Min aña soraw biräm - ni öçen 20 genä meñ, nik 50 yä 100 meñ tügel? Bağdad etläre bu xärbilärneñ mäyetlären zarığıp kötkänen belmisez meni? Böten armiägezne cibäregez, ul möcähetdinnär qulınnan yuq iteler, dönya sezneñ yawızlıqtan arınır. Xälifä häm cihad cire bulğan Ğiraq, Allahı Täğälä yärdäme wä qüäte belän sezneñ kebek 10 armiäne cirli ala" di Ayman Äs-Zäwähiri.

Bu östämä köçlär Bağdadqa inde kilä dä başladı. Uzğan atna axırında anda 3200 amerikan xärbie kilde. Başqalada barlığı 17 meñ xärbi urnaştıru küzdä totıla. Amerikan prezidentı bu köçlär şähärdä tärtip urnaştırır dip ömetlänä:

"Wazğiät üzgärä, başqaça äytkändä, min uñay täräqqiät täemin iterlek üzgäreş bulmağan cirgä ğäskär cibärmim" dide uzğan atnada George Bush.

Quşma Ştatlarnıñ Ğiraqtağı yaña xärbi citäkçese bulaçaq general David Petraeus süzlärençä, amerikan xärbiläre Ğiraq armiäse belän berlektä Bağdadnıñ tirä yağın ğisyançılardan arındıraçaq.

Generalnı bu wazifağa raslaw tıñlawları Senatta sişämbe ütä. Petraeus süzlärençä, amerikan xärbiläre Bağdadnıñ tirä yağındağı bistälärdä urnaşaçaq. Bu äwälge taktikadan üzgäreş bulıp tora. Elek alar zur nığıtmalarda töplänä ide.

Qayber işarälärgä qarağanda, xädäf itep radikal şiği citäkçe Moqtada Äs-Sadrnıñ Mähdi armiäse sayalanırğa mömkin.

Amerikan xärbiläre äytüençä, soñğı 6 atnada alar Ğiraq köçläre belän bergä Äs-Sadr yaqlı 600läp ğisyançını totqarlanğan.

Şunı sizepme, uzğan atnada Äs-Sadr parlamenntağı wäkillärenä Ğiraq xökümätenä 2 ay elek iğlan itelgän boykotnı tuqtatırğa quşqan. Anıñ wäkilläre amerikan xärbilären Ğiraqtan çığarunı taläp itkän ide.

Xäzer Mähdi armiäse elek qatnaş bulğan, yağni sönnilär dä, şiğilär dä yäşägän berniçä bistäne kontrol itä. Mähdiçelär andağı sönnilärne quıp çığardı. Üz näübätendä sönnilär şiği bistälärgä höcüm itä. Şulay, utqa-ut, höcümgä höcüm - Ğiraq watandaşlar suığışna taba tägäri.

Ali Ğilmi
XS
SM
MD
LG