Accessibility links

чәршәмбе, 7 декабрь 2016, Казан вакыты 13:40

Qazaxstan möslimäläre yawlıq belän räsemgä töşä, Qırğızstan üz köräşen däwam itä


3-4 yıl elek Tatarstanda möselman xatın-qızlarınıñ pasportqa räsemgä töşkändä yawlıqların salmaw xoquqın yawlaw eşe, mäxkämälärne häm uram cıyınnarın äle dä xäterlisezder, xörmätle tıñlawçılar. Qazaxstan möslimäläre dä uzğan ayda şundıy uñışqa ireşte. Kürşe Qırğızstanda isä – yawlıq bäyläp räsemgä töşü röxsät itelmi. Azatlıqnıñ xatın-qızlar säxifäsendä sişämbe könne şul xaqta tıñlağız.

Qazaxstanda yözgä yaqın millät yäşi, ämma bu ilne – möselman ile dip küz aldına kiterälär. Alay da elekke sovetlar berlegeneñ ber öleşe bulğan Qazaxstan İslam qanunnarı belän yäşämi. Möslimälärgä yawlıq belän pasportqa räsemgä töşü röxsäte barı tik fivral ayında birelde.

Yustisiä ministrlığınıñ dokumentlar bülege başlığı Janar Kojäxmätova süzlärenä qarağanda, alarğa möräcäğätlär küp bulğan:

"Bu yaña qarar – baş kieme belän här keşegä räsemgä töşärgä röxsät birmi. Bu kübräk, dini säbäplärdän yawlıqların sala almağan xatın-qızlarğa qağıla. Monı sorap Yustisiä ministrlığına bik küp möräcäğätlär kilde."

Qazaxstandağı Almatı-Helsinki Komitetı başlığı Ninel Fokina, ni öçen bu mäsäläneñ Yustisiä ministrlığında qaralğanın añlap citkermi:

"Bu konstitusiä mäsäläse dä tügel, qanun mäsäläse dä tügel. Ber qayda da dokumentlarğa nindi räsem yasarğa digän süz yuq. Eçke eşlär ministrlığında ğına nindider kürsätmälär bar. Ämma alar qanun tügel. Şuña kürä bu eşkä Yustisiä ministrlığınıñ qatnaşuın añlaw qıyın. Bälki pasport xezmäteneñ Yustisiä ministrlığı qaramağına küçüe belän añlatıladır. "

Tatarstan möslimäläre bu mäsäläne üzläre öçen inde 3-4 yıl elek xäl itte.

Yawlıq bäyläp räsemgä töşüne röxsätenä qarşı çığuçılar – iminlek mäsäläsen alğa quya. Qazaxstandağı "Millät Yazmışı" isemle xökümättän bäysez oyışma räise Dos Xoşim, keşe xoquqları möhim, ämma xoquq yaqlaw iminlek xisabına bulırğa tieş tügel, dip sanıy.

Üzäk Aziäneñ başqa illärenä kilgändä, Taciqstanda möslimälär räsemgä töşkändä yawlıqların salmıy, Üzbäkstan häm Törkmänstanda isä möselman xatın-qızlarına andıy röxsät birelmägän.

Qırğızstan möslimäläre dä üz xoquqları öçen köräş başladı. Üktäber ayında ul çaqtağı premyer-ministr Feliks Kulovqa bu xaqta möräcäğät yullanğan, 40 meñgä yaqın imza cıyılğan. Ämma räsmilär 300 meñ imza bulunı sorıy. Qırğızstan xökümäteneñ räsmi cawabında – yawlıqnı salmıyça pasportqa räsemgä töşü - milli iminlekkä qurqınıç tudıra, dielgän.

Alsu Qormaş
XS
SM
MD
LG