Accessibility links

сишәмбе, 6 декабрь 2016, Казан вакыты 17:16

AQŞ Farsı qultığında xärbi künegülären başlap cibärde


Quşma Ştatatlarnıñ xärbi dingez köçläre Farsı qultığında 2003 yıldan birle, iñ zur xärbi künegülären başlap cibärde. Xärbi künegülärgä Jonn C. Stennis häm Dwight D. Eisenhower isemendäge ike oçqıç karabı häm alarnıñ xärbi törkemnäre qatnaşa.

Xärbi dingez köçläre citäkçelege belderüendä, xärbi çaralarnıñ nidän ğıbärät buluı turında äytelä. İke xärbi oçqıç karaplardan kütärelep, hawadan cir öste hädäflärenä atırğa oyränäçäk. Künegülär öç yunäleştä baraçaq – su astı köymälärenä qarşı, cir öste hädäflärenä häm minalarğa qarşı.

6meñ yarımlık ğäskäre bulğan QŞ John Stennis oçqıç karabı Farsı qultığına bu atnada kilde.

Quşma Ştatlarnıñ xärbi dingez köçläre citäkçese Kevin Aandahl, xärbi qarap İrannıñ su bilämälärenä kermäyäçäk dip iğlan itte. İlneñ su bilämäläre, yardan sanağanda, 12 mil ozınlığındağı aranı täşkil itä.

Künegülär, Washigton häm Tähran arasında, İran atom programması häm Ğıraq mäsäläsendä kierenkelek artqan mälgä turı kilde. Şulay uq, Quşma Ştatlarnıñ berektäşe Britaniäneñ 15 xärbie qulğa alınğanan soñ, London häm Tähran arasındağı mönäsäbätlärdä kierenkelek arttı. Quşma Ştatlar wäkilläre bilgeläp ütkänçä, künegülär İranğa basım yasaw maqsatın qıymıy. Häm Washigton töbäktä üzeneñ köçen arttıra, dip şiklänüçelärne tınıçlandırırğa tırıştı. Quşma Ştatlar räsmiläre äytkänçä, planlaştırılğan künegülär Britan dingezçeläreneñ qulğa alınuı belän bäyle tügel.

Xärbilär, İran AQŞnıñ xärbi karapabına arttı, digän xäbärne kire qaqtı. Şul arada Tähran, qulğa alınğan 15 Britan dingezçelärneñ eşe mäxkämädä qaralığra mömkin, dip belderä. İran tışqı eşlär ministrlığı süzçese Möhämmäd ali Hosseini İran televideniesenä birgän äñgämäsendä, tikşerüe eşe başlanuı turında xäbär itte.

Bu Britan dingezçeläre İraan çigen qununsız räweştä kiçkän häm alar İran islam respublikasında qulğa alındı. Bez xäzer mäsäläne tikşeräbez. Alar imin cirdä totıla häm islam citäkçelege prinsipları nigezendä alarğa keşelekle mönäsäbät kürsätelä

Sişämbedä, Britaniä premyer-ministrı Tony Blair, Tährannıñ dingezçelärne tiz arada azat itüenä ömetlänüen äytte.

“Bez İrannıñ dingezçelärne azat itüenä ireşä alırbız, dip ömmetlänäbez. Ägär bu bulmyı ikän, bu eş başqa däräcägä küçäçäk, läkin xäzerge waqıtta bez diplomatik tırışlıqlanıñ näticäle buluına ışanarğa telibez.”

İran, Britan dingezçeläre İrannıñ su bilämäläreneñ çigen bozğan, dip belderä. Brtianiä isä, dingezçelär anda BMO isemennän eş yörtkändä kergän, dip añlata.

Bikä Timerova
XS
SM
MD
LG