Accessibility links

пәнҗешәмбе, 8 декабрь 2016, Казан вакыты 04:59

İr-baş, xatın-muyın: Fransiä prezidentı änisen yarata


Fransiäneñ yaña prezidentı Nicolas Sarkozy saylawlar aldınnan, xökümätneñ yartısı – xatın-qızlardan torır dip süz birgän ide. Sarkozy tormışında xatın-qızlar bolay da bik zur rol uynıy, fransuz basmaları – Nicolas belän anıñ xatını Cecilia arasındağı yalqınlı mönäsäbätlär turında yaza, çınbarlıqta isä Sarkozynıñ tormışında iñ küp urın alıp torğan xatın-qız anıñ 81 yäşlek änise, dilär.

Madam Andree Sarkozy ulınıñ saylawaldı kampaniäsendä aktiv qatnaştı, dip yaza Guardian basması. Nicolasnı täñqitlägän här çığışqa qarşı çığıp ul üz ulınıñ anıñ qadär ük qurqınıç bulmağanın kürsätergä tırıştı.

Fransiädä, qayber başqa illär belän çağıştırğanda, säyäsätçelärneñ şäxsi tormışına tıqşınu ğadäte bik yuq, ämma ana-bala mönäsäbätlärenä kilgändä, biredä inde cirle mäğlümat çaraları xällärne centekläp tikşerergä irenmi.

Madam Sarkozy macar aristokratı bulğan irennän ayırılıp 3 ulın üze genä tärbiälägän. Parijda ul ätiseneñ yortında yäşägän, balalar şunda üskän. Andree Sarkozy advokat bulırğa xıyallanğan, keçkenä ulları irtän uyanğançı häm kiç yoqlap kitkännän soñ ul üze uqığan, imtixannarğa äzerlängän.

Öç malaynıñ urtançısı bulğan Nicolas balaçaqta tiz qızıp kitüçän bulğan. Säyäsi yulında da Sarkozy kisken çığışları belän tanıldı. Ämma üz ulın yaqlap, madam Sarkozy här waqıt – "yuq, ul elek qızıp kitä inde, xäzer ütte inde ul anıñ" dip äytergä yarata. Sarkozylar ğailäse turında kitap yazğan Elise Karlin, Nicolas Sarkozy änise belän bik yaqın. Ul malaylarına töp prinsiplarnı añlatıp birde," dip yaza.

Mäğlüm bulğança, saylawaldı kampaniäse waqıtında Sarkozy xatın-qız, sosialist Segolene Royal belän köndäşlek itte. Bu mäsälädä dä üz üzen niçek totarğa digändä Sarkozyğa änise kiñäş birgän dilär. İmeş üzen xätär ir keşe, kättä itep totmasqa, ä kiresençä, yomşaq bulırğa, tirä-yağına köçle xatın-qızlarnı cıyarğa kiräk, digän Nicolasğa anıñ änise. Çındırmı – yuqtırmı, ämma Nicolas Sarkozy prezident bulsın öçen küp eşlägän xatın-qızlarnıñ berse – Simone Veils buldı. Simone xanım – Fransiädä bala töşerergä röxsät itkän qanun öçen köräştä ciñgän xatın-qız.

Çärşämbe könne Sarkozy prezident antın kiteräçäk. Eşkä kereşkäç ul yaña ministrlar isemnären iğlan itäçäk. Prezident süzendä torsa, 15 ministrnıñ yartısı – xatın-qızlar bulırğa tieş. İnde xäzerdän ük mäğlüm bulğança, xökümättä xäzer saqlanu ministrı bulğan Michele Alliot-Marie qalır, dip farazlana. Şulay uq xäzer Sarkozynıñ matbuğat wäkile Räşidä Dati – çığışı belän Tönyaq Afrikadan bulğan xanım yuğarı wazifalarnıñ bersen alır dip kötelä.

Sarkozynıñ yardämçese, elekke ministr Roselyne Bachelot, "Nicolas Sarkozy xatın-qızlarnı qullana digän fiker döres tügel, ul alar belän eşlärgä yarata," dip belderde. Ägär Sarkozy üz tiräsenä xatın-qızlarnı cıysa – bu Fransiä öçen çınnan da zur üzgäreş bulaçaq. Bügenge köndä anda parlamentta 14% qına xatın-qızlar. Säyäsi firqalär, namzätlär itep xatınnar belän irlärne ber tigez çığarğançı – cäza tüläwne xup kürä, dip yaza Guardian basması.

1 atna elek Nicolas Sarkozy prezident saylawlarında ciñde, dip iğlan itelgäç, bezneñ qazandağı xäbärçelärebez uramğa çığıp xalıqnıñ fikerlären beleşkän ide:

Fransiädä xalıq bu yulı tatarlar äytmeşli, ir-baş, xatın-muyın prinsibınnan çığıp tawış birgän bulıp çığa...

Älegä xatın-qızlar iñ küp bulğan xökümät – Finlandiädä. İr keşe Matti Vanhanen citäklägän xökümättä 20 ministrnıñ 12se – xatın-qızlar. 2000nçe yıldan birle Finlandiädä prezident – xatın-qız, Tarja Halonen.

Alsu Qormaş
XS
SM
MD
LG