Accessibility links

шимбә, 10 декабрь 2016, Казан вакыты 13:53

Quşma Ştatlar Ğiraq häm Äfğanstandağı suğış säyäsäten köyläw öçen maxsus wäkil bilgeli


Prezident George Bush Aq Yortta yaña ber wazifa buldırdı. Ğiraq häm Äfğanstandağı suğış säyäsäten anda xäzer maxsus keşe köyläp toraçaq. Bu urınğa prezident general Douglas Lutenı bilgeläde. Anıñ eşe nidän ğibarätä bulaçaq soñ? Bu sorawğa älegä berkem dä tögäl cawap birä almıy. Mäğlümät çaraları şundıyraq fiker belderä - general nigezdä Washingtonnıñ suğış säyäsäten cämäğätçelek tarafınnan yaqlatu öçen cawaplı bulaçaq.

General Lute şuşı yaña urınğa äle senat tarafınnan da raslanırğa tieş. Räsmi töstä anıñ bu wazifası däwlät iminlege kiñäşçeseneñ urınbasarı dip atalsa da, ul turıdan-turı prezident qarşında xisap totaçaq.

Aq Yorttan alınğan xäbärlärgä qarağanda, Douglas Lutenıñ töp eşe - prezidentnı Ğiraq häm Äfğanstandağı amerikan qorallı köçläreneñ, andağı ilçeleklärneñ ixtiacları belän waqıtında tanıştırıp toru häm yardäm kürsätü bulaçaq.

Lutekä qädär bu urınğa bilgeläw täqdime başqa berniçä xärbigä yasalğan bulğan, ämma alar barısı da monı kire qaqqan. General Lute bügenge köndä AQŞ qorallı köçläreneñ Berläşterelgän baş idaräsendä ğäskäri operatsiälär citäkçese bulıp eşli.

Amerikan başqalasındağı säyäsi dairälärdä küplär, tağın bu urınnı da buldıru nigä kiräk buldı, xärbi häm diplomatik bürokratiä Washingtonda bolay da citärlek, bu eşlärne, yäğni suğış ixtiacların barlawnı häm köyläwne Däwlät İminlege Şurası alıp bara bit inde, digän sorawlar quya.

Yalğa çıqqan amerikan xärbie Kenneth Allard fikerençä, prezident Bush xäzer suğışnıñ aldan kötelgängä qarağanda yamanraq baruın aqlaw, cämäğätçelektä yaqlawnı arttıru öçen nindider yaña yullar ezli, anıñ yaña wazifa buldıruı artında näq menä şul yata:

"Minemçä, başqalarnıñ bu täqdimne kire qağuı säbäbe dä şul - alarnıñ kübese "bu yaña ber kosmetik çara ğına" dip uylağandır. Bezdä küpmeder däräcädä yaña fikerlär betep kilä", di yaldağı xärbi Kenneth Allard radiobız xäbärçesenä.

Allard general Lutenı şäxsän yaxşı belüen, anıñ çınnan da yuğarı äzerlekle xärbi belgeç buluın da äytä, ämma xätta ul da Washingtonda utırıp Quşma Ştatlarnıñ Ğiraq yä Äfğanstandağı ğäskäri eşlären yaxşırta almayaçaq, dip isäpli.

Ämma bu xaqta başqa törle uylawçılar da bar. Brookings institutındağı ölkän xezmätkär Michael O''Hanlon, misal öçen, general Lutenıñ eşe AQŞnıñ suğış ölkäsendäge säyäsäten turıdan-turı bilgeläw bulmasa da, ul şul säyäsätne cirenä citkerep ğämälgä quyuğa zur öleş kertä alaçaq, dip uylıy. Şuña kürä anıñ Ğiraq häm Äfğanstandağı amerikan ğäskärlärenä yardäm itü mömkinlekläre bulaçaq, di O''Hanlon:

"Yaxşığamı, naçarğamı, Aq Yort üzeneñ ni eşlärgä kiräklegen añlawı xaqında qarar itte häm xäzer ul säyäsätne yaxşıraq itep ğämälgä quyarğa teli. General Lute bürokratiä kirtälären ütep eş itäçäk, anıñ wazifası şul", di Michael O''Hanlon.

Şuşı belgeç fikerençä, Washington yaña urınnı Ğiraqtağı AQŞ xärbiläreneñ häm diplomatlarınıñ üz eşlären bergäläşep cirenä citkerep başqara almawına cawap yözennän buldıra.

Kärim Kamal
XS
SM
MD
LG