Accessibility links

шимбә, 10 декабрь 2016, Казан вакыты 02:13

Balkan energiä sammitında Putin Rusiä proyektların täqdim itte


Rusiä prezidentı Vladimir Putin yäşkämbe könne Zagrebta Balkan energiä sammitında çığış yasap Könyaq Könçığış Yewropa belän Rusiä arasında energiä xezmättäşlegen arttırırğa çaqırdı häm töbäkkä berniçä proyekt täqdim itte.

Putin bu sammita duslıq, xezmättäşlek häm ışanıç turında söyläde. Rusiäne ışanıçlı partner häm sammita qatnaşuçı 9 ilneñ tarixi dustı dip sürätläde. Ä Sammitta Albania, Bolğarstan, Bosniä-Herzegovina, Gretsiä, Makedonia, Serbiä, Sloveniä, Romania häm Montenegro qatnaşa.

Putin Rusiäneñ bu töbäkkä bitaraf bulmawın kürsätü öçen berniçä yaña proyekt ta täqdim itte.

Şularnıñ berse Barlıq Qara diñgez illären totaştıra alırday häm urtaq energiä bazarınıñ nigeze bula alırday elektr çılbırı tözü.

Ul şulay uq Rusiäneñ Balkandağı neft häm gaz proyektlarında qatnaşırğa teläwen belderde. Putin Rusiä şirkätläre dönyadağı iñ yaxşı şirkätlär belän yarışa ala, ä Rusiäneñ tabiği möxit standartları başqa illärdägedän yuğarıraq dide.

"Rusiä gaz satu söyläşülären däwam itärgä häm töbäkneñ tranzit mömkinleklären tağın da nığraq faydalanırğa, qayber balkan illärendä gaz bazları tözergä teli. Bu töbäkneñ energiä täeminäten yaxşırtıp qına qalmıyaçaq, tulayım Yewropanıñ eneriä problemaların çişü yağınnan qarağanda da aña iğtibarnı häm anıñ ähämiäten arttıraçaq" dide Putin.

Putin şulay uq Gazprom belän Italiäneñ Eni şirkäte arasında Qara Diñgez töbendä ütkärgeç tözü turında şimbä könne imzalanğan kileşüne maqtadı.

Qara Diñgez töbennän uzuçı ütkärgeç Rusiä belän Bolğarstannı totaştıraçaq. Anıñ aşa Rusiä nefte Italiägä häm Üzäk Yewropağa qudırılaçaq.

"Bu mömkin bulğan häm küpne wäğdä itüçe proyekt. Ul tulayım Yewropanıñ energiä täeminäten yaxşırtuğa öleş kertäçäk. Bez bu proyektnı Rusiä xökümäte belän bergä Italiä xökümäteneñ genä tügel Yewropa Berlege komissiäseneñ dä xuplawına bik şatbız" dide Putin.

Sammitta qatnaşuçılarnıñ uyında şulay uq Rusiäneñ Duslıq ütkärgeçe belän Xorvatiäneñ Ädrän ütkärgeçen totaştıru planı, Bolğarstannıñ Burgas portı belän Gretsiäneñ Aleksandropolis portın totaştıru ütkärgeç tözü proyektı da buldı.

Putin Burgas-Aleksandropolis ütkärgeçe yılına 35 million kubometr neft qudıra alaçaq häm anı xätta 50 millionğa qädär citkerep bulaçaq dide.

Mondıy ütkärgeç Duslıq-Ädrän proyektınıñ ähämiäten kimetmäsme digän sorawğa Rusiäneñ energiä ministrı Viktor Xristenko Rusiä proyektları ber-bersenä qarşı kilmiäçäk dip ışandırdı.

Interfax agentlığına, Xristenko ber genä ideyanı da aşığıp kümärgä yaramıy, anı waqıt qına kümä ala digän häm Burgas-Aleksandropolis proyektı xäzer iñ möhim häm alğa sörelüçe proyekt digän.

Putinnıñ Rusiäne Balkannıñ küptänge häm kiläçäk dustı itep sürätlärgä tırışuına ber çığarmanı isäpkä almağanda ällä ni qarşılıq bulmadı.

Barı tik Bolğarstan prezidentı Traian Basescu ğına töbäkneñ Rusiä energiäsenä bäylelegen kimetergä kiräklegenä basım yasap Bez energiäne säyäsi basım yasaw qoralı bularaq qullanunı berqayçan da qabul itmiäçäkbez dide.
XS
SM
MD
LG