Accessibility links

шимбә, 3 декабрь 2016, Казан вакыты 16:43

Berezovskiy: Miña höcüm omtılışı minem belgännäremne rasladı ğına


Kiñküläm mäğlümät çaraları Britaniädä säyäsi sıyınu alğan kürenekle Rusiä eşmäkäre Boris Berezovskiyğa höcüm äzerlängän buluı turında xäbär itä. Berezovskiynıñ Britaniädän çit ilgä kitep toruı, yallanğan üterüçe totılğannan soñ Londonğa qaytuı turında äytelde. Tulıraq mäğlümät alu öçen Azatlıq radiosı Berezovskiynıñ üze belän söyläşte.

AZATLIQ: Sez cınnan da yallanğan üterüçedän qaçıp Angliyeden çitkä kittegezme?

BEREZOVSKIY: Äyye. Britan politsiäse miña ildän kitärgä häm wäzğiät açıqlanğannı kötärgä kiñäş itte. Şulay buldı da. Ber atnadan alar miña şaltıratıp qaytırğa bula dip äyttelär.

AZATLIQ: Xäbärlärdän çınlıqta ni bulğançılın açıq añlaw mömkin tügel. Sezne üterergä cıyınğan keşe qulğa alınğanmı, yäki Britaniädän çığarıp cibärelgänme?

BEREZOVSKIY: Mindä bu turıda bernindi östämä mäğlümät tä yuq. Miña barı tik wäzğiät açıqlandı, ul keşene zararsızlandırdıq dip kenä äyttelär. Häm şunıñ belän miña ilgä qaytırğa mömkinlek tudı.

AZATLIQ: Sez Sun häm Times gazetlarınnan ul keşe Londonnıñ Park Lane öleşeneñ Hilton qunaqxanäsendä bulğan digän xäbärlärne uqıdığızmı?

BEREZOVSKIY: Min ul mäqälälärne uqıdım. Anıñ Hiltonda buluı ber dä säyer tügel. Cönki ul qunaqxanä minem ofistan cäyäw 3 minutlıq yulda ğına.

AZATLIQ: Ul keşeneñ kem buluın sezgä äytmädelärme? Berär tanışığız tügelme?

BEREZOVSKIY: Miña ul keşene belgänlegemne äyttelär. Ämma min qayber mäğlümätlär turında söyli almıym.

AZATLIQ: Şulay itep bu üterü omtılışı turında sez barı şunı ğına äytä alasızmı?

BEREZOVSKIY: Äyye. 3 ay elek miña Mäskäwdäge duslarım monda Londonda miña höcüm äzerlänüe turında, ul höcümneñ Litvinenko oçrağına bötenläy oxşamıyaçağı turında äytkännär ide. Mäskäwdän min belgän keşe kiläçäk, ul minem belän oçraşunı sorıyaçaq, oçraşu waqıtında ul mine üteräçäk, politsiädän qaçmıyaçaq, üzeneñ ğämällären käsep ölkäsendä miña bulğan däğwaları belän añlataçaq didelär. Andıy oçraqta, ägär dä anıñ däğwaları bulğan, häm ul qaçmağan ikän, aña 20 yıllıq törmä cäzası birelergä mömkin. Angliä qanunnarı nigezendä tärtiple bulsañ 10 yıldan sine azat itälär. Aña, ğailäsenä aqça tülänäçäk, yäğnu ul tulısınça täemin itelgän bulaçaq. Ul Mäskäwneñ Matrosskaya Tişina törmäsendä tügel, monda Angliädäge törmädä utıraçaq. Bu inde anı azaplamıyaçaqlar, ütermiäçäklär, yaxşı aşataçaqlar, televizor qarıyaçaq, sport belän şöğellänäçäk, uqıyaçaq digän süz. Äle genä bulğan xällär min belgänne häm politsiägä söylägänne rasladı ğına.

AZATLIQ: Britaniädäge Rusiä ilçese Yuriy Fedotov Berezovskiy bu qıyssaları belän iğtibarnı üzenä belderelgän ğäyepläwlärdän, aqça yuu, xärämläşü ğäyepläwlärennän çitkä borırğa, Lodnonnıñ Rusiägä qarşı adımnarın Britan cämäğätçelege aldında aqlarğa tırışa dide. Moğa niçek cawap birersez?

BEREZOVSKIY: Min xäzer üz advokatlarım aşa ilçe äfände Yuriy Fedorovnı yala yağu öçen cawapqa tarttıru mömkinlegen tikşeräm. Ilçene monıñ öçen cawapqa tartıp bulamı-yuqmı ikänen xäzer minem yuristlarım açıqlıy. Şunısı açıq, ilçeneñ minem nindider cinayät qıluım, aqça yuuım turında äykännäre yalğan, häm ul monı üze dä belä. Çönki mine äle ber mäxkamäneñ dä, Rusiädägeseneñ dä, başqa berärseneñ dä xökem itkäne bulmadı.

AZATLIQ: Sez Litvinenkonı ağulap üterüdä şiklänelgän Andrey Lugovoynı da, üzegezne dä neytral ber ildä xökem itü mömkinlege turında äytkän idegez. Könbatış belän Rusiä arasında qaysı il neytral bula ala? Qıtaymı? Hindstanmı?

BEREZOVSKIY: Neytral digän süz qullanğanım bulmadı. Min başqarma xakimiättän bäysez, rişwätçelekkä birelmägän xökem sistemasına iä başqa berär il didem. Andıy illär bik küp. Mäsälän Daniä, Norvegiä, Germaniä. Yewropada kimendä 5-6 şundıy ilne atap bula. Min monı barı ber maqsat belän genä eşlädem. Tağın ber märtäbä qabatlıym. Saşa Litvinenkonı üterergä Putin şäxsän üze quşqan. Şuña kürä bernindi şartlarda da Lugovoyğa Rusiädän çığu mömkinlege birmiäçäklären kürsätäsem kilde. Lugovoynıñ Britaniädä ğädel xökem bulmıyaçaq, başqa berär ildä xökem itelü mömkinlege turında äytüenä qaramastan. Tupas itep äytkändä, Kreml xäzer poçmaqqa qısrıqlandı. Şuña da qaramastan ul aldıy häm uynıy. Min barı tik anıñ şul yalğanı öçen urrınnı tağın da kimetergä telim.
XS
SM
MD
LG