Accessibility links

шимбә, 3 декабрь 2016, Казан вакыты 07:49

İnguşetiädä militsiägä qarşı höcümnär tuqtalmıy


Rusiäneñ İnguşetiä respublikasında, köçäytelgän iminlek çaraları kürelügä qaramastan, militsiägä qarşı höcümnär däwam itä. Räsmilär monı kürşe Çeçnädän kilgän suğışçılar eşe dip añlatsa, belgeçlär - çın säbäp xalıqnıñ rizasızlığında, di.

İnguş respublikasında sişämbe irtäsendä bulğan höcümdä tağın ber militsiä xezmätkäre üterelgän, öçese cäräxätlär alğan. Räsmilär äytüençä, Tübän Açaluki awılında bilgesez keşelär militsiä avtobusına ut açqan häm soñnan maşinalarına utırıp qaçqan.

"Malogbek rayonı Tübän Açaluki awılında militsiä avtobusı utqa totılğan. Höcümçelär qara töstäge VAZ-2112 maşinasında bulğan. Respublikada Vulkan-5 isemle operatsiä iğlan itelde" dide respublikanıñ eçke eşlär ministrlığı süzçese Yaxya Xadjiev.

Militsiägä qarşı höcümnär İnguşetiädä inde berniçä atna bara. Uzğan çärşämbe Rusiä köçläre töbäktä kiñ külämle operatsiä ütkärde. İke kön dä ütmäde başqala Magasta cirle FSB binasında höcüm yasaldı, ber xezmätkär häläk buldı, ikese yaralandı.

Höcümgä bäyle räwşeätä 4 keşe qulğa alınğan.

Tağın 3 könnän, düşämbedä, Malogbek qalasında militsiä kizüenä yaña höcüm yasaldı.

Räsmilär bu höcümnärne kürşe Çeçnädän kilgän suğışçılar oyıştıra, dip añlata.

Ämmä küzätüçelär äytüençä, inguşlarnıñ üzlärendä dä cirle xakimiätkä qarşı näfrät xisläre bik köçle. Kemder xäbärsez yuğalğan tuğannarı öçen üç ala, kemder – başqa säbäplärdän, xakimiärlär monı yäşerergä tırışa di ingushetiya.ru isemle internet säxifäse möxarrire Zalina Marxieva:

"Bezneñ xakimiätlär xalıqnıñ küzen yomırğa, barısı da al-da-göl dip kürsätergä tırışa. Tirä yaqta şartlawlar, ä däwlät televideniese kombaynnar, boday uñışı turında söyli" dide Zalina Marxieva.

İnguşetiädä kierenkelek inde küptännän, ikençe Çeçen suğışı başlanğannan birle arta bara. Cirle iminlek köçläre tazartu ğämälläre başqara, islamçılıqta ğayeplängän yäşlärne qulğa ala. Kübese xäbärsez yuğalan.

2002 yılda Ruslan Auşev urınına yaña prezident – Murat Zäzikov kilgäç xalıqta rizasızlıq tağı da arttı. Küpçlär ul saylawlarnı xärämläşü dip atadı.

Elekke FSB ofitserı Murat Zäzikovnıñ xalıqta abruyı bik tübän. Ul xalıqnı qayğırtu tügel, ä Kreml quşqannı ütäw belän mäğül dip sanala.

10 kön elek kenä anıñ üzenä dä höcüm yasaldı. Ul barğan maşina utqa totılğan. Ämmä berkemgä dä zıyan kilmägän.

ali ğilmi
XS
SM
MD
LG